Шағым айтқан тұрғынға төтенше жағдайлар бөлімі қол ұшын созды
Бұған дейін Аманкелді ауылының тұрғыны Әлия Ахметованың үй-жайына қызыл су төніп тұрғанына шағымданғаны жөнінде хабар таратқан едік. Бүгін түн ортасынан ауған шақта осы кісіге аудандық төтенше жағдайлар бөлімінің мамандары көмекке келді.
«Мана үйді су басып жатыр деп айтып едім. Енді, міне, он екіде аудан азаматтары көмек беруге келіп тұр. Бастысы, үйге су кірмесе болды. Білем, бүкіл ауданның тұрғындары қиындыққа тап болып отыр. Бірақ көмек бәріне бірдей жасалғанын қалаймын», – дейді қария.