Комсомол ауылдық округіне қарасты барлық ауылдар мен Тәгіл округіне қарасты Соналы ауылының кәсіпкерлері мен жанашырлары Қоскөл мен Дудаков ауылының жолына жөндеу жұмыстарын жүргізді.
Игі бастаманы округ тұрғыны Игілік Мундаков деген азамат бастап, аудандық мәслихат депутаты Жауынбай Чистобаев пен округ тұрғындары қостап, бір күннің ішінде жолды тегістеп тастады.
– Шынын айтқанда, бұл жол біздің ығырымызды шығарды. Комсомол ауылдық округінің кәсіпкері Марат Мағзұмов екеуіміз осы мәселені шешу үшін бастама ұйымдастырдық. WhatsApp тобын ашып, округ тұрғындарына хабарладық. Жанашыр жандар бізге қосылды. Алғашқылардың бірі болып, Қоскөл элеваторының директоры, аудандық мәслихаттың депутаты Жауынбай Чистобаев қол ұшын созып, техникамен көмектесті. Жалпы, жергілікті кәсіпкерлердің бәрі қолдады. Біз, енді бұл бастаманы челлендж ретінде Тәгіл ауылдық округіне табыстағымыз келеді, – дейді басты ұйымдастырушы Игілік Мундаков.
Айта кетейік, бұған дйін «Сатаев» ШҚ басшысы Баймырза Сатаев Тәгілден Новый Дудаковқа дейін ағымдағы жөндеу жұмыстарын жасаған болатын.
Жалпы, 30 шақырымды қамтитын жол жөндеу жұмыстарына 50 шақты адам мен 11 техника жұмылдырылды. «Бірлік бар жерде, тірлік бар» екенін көрсете білген азаматтар бір жағадан бас, бір жеңнен қол шығарып, жұмыла кірісті.
Бұл сауапты істің шапағатын сапарға шыққан жолаушылар, шалғайдағы ағайын көріп, алғысын да айтар. Туған жеріне осындай тарту жасайтын жомарт жанды азаматтар көп болса, ауылдарымыз түлеп жаңаратыны сөзсіз.
Сарыкөл ауданы