Облыстық қуыршақ театрында шеберлік сабақтары, сондай-ақ балаларға арналған музыкалық қойылым көрсетілді.
Мәдениет және өнер қызметкерлері күні қарсаңында облыстық қуыршақ театрында мерекелік іс-шара ұйымдастырылып, театр ұжымы көрермендерге қуыршақ өнері әлемімен жақынырақ танысуға және шығармашылық адамдарымен уақытты қызықты өткізуге тамаша мүмкіндік берді.
– Мереке өте жақсы өтті, балалар өздерін өте белсенді ұстады. Олар әртістердің жұмысымен етене танысып және өздерін актер рөлінде сынау мүмкіндігі болып, қуыршақтарды қимылға келтіріп оларды дыбыстауға тырысты. Балалардың қуанышына бәріміз қуандық,- деді әдебиет бөлімінің меңгерушісі Гүлмира Мирамова.
Қуыршақты қимылға келтіру бойынша шеберлік сабағымен қоса, интерактивтік ойын элементтері бар қойылымдарға шағын экскурсия өткізілді. Бұл мерекелік іс-шараға қалалық мәдени ұйымдардың басшылары және мәдениет басқарма қонақтары мен қала тұрғындары, балалар да жиналды.
– Маған бұл іс-шара қатты ұнады, біз қуыршақтарды өз қолымызбен ұстап оларды ойнатып, дауысын салып көрдік және дәмді бауырсақ жедік, маған осындай мерекелер қатты ұнайды, – дейді іс-шараға қатысушы бүлдіршін.
Кеш соңында, қонақтарға арнайы «Праздник для всех» атты музыкалық қойылым көрсетіліп, тұрғындар мен балдырғандар дән риза болып тарқасты.
Жансая Аянқызы