Бүгін Қостанайда жылдағы дәстүрмен “Студент көктемі-2023” фестивалі басталды. Екі күнге ұласатын ауқымды іс-шараға облыстағы алты ЖОО студенттері қатысып отыр.
Елгезек, белсенді жастар бүгін Қостанайдағы “Жастар сарайы” ғимаратының алдына жиналып, фестивальдің ашылу салтанатын өткізді. Оқу орындарының намысын ту етіп ұстап келген командалар өз-өздерін таныстыру рәсімін жасасты. Ұйымдастырушылар – “Жас Отан” қоры мен облыстық Жастар ресурстық орталығы өкілдері бұл жоба дарынды студенттерді анықтауға мүмкіндік беріп қана қоймай, студенттер қозғалыстарының дамуына ықпал етеді.
Сонымен, фестивальдің алғашқы күні бір мезетте спорттық ойындар басталды. Командалар М.Дулатұлы атындағы ҚИнЭУ-де волейбол, ЧелМУ-де баскетбол, Ахаң атындағы ҚӨУ-де шағын футболдан сынға түсті. Мұның сыртында студенттер қауымы қаланың көрікті жерлерінде селфи жасап, суретке түсуден жарысты. Бұл фестиваль аясындағы тапсырма – “Фотокросс” квесі еді. 
Ал түстен кейін жастар қауымы “Смарт-орталықта зияткерлік ойыннан білімдерін сынап көрді. Алғашқы күннің жоспары “МАРТ” сауда үйі маңындағы сахнада “Жайдарман” ойындарымен, би жарысымен және OpenAir дискотекасымен аяқталмақ.
28 сәуірде, яғни ертең спорт жарыстарының финалдық бәсекелері өтеді. Барлық жарыстар мен сайыстардың қорытындылары шығарылып, Студенттер үйінде жеңімпаздар анықталып, ақшалай сыйлықтармен марапатталады. Фестиваль соңы ЖОО әншілері мен би ұжымдарының гала-концертімен түйінделмек.