Бүгін, БАҚ қызметкерлері күні қарсаңында облыстық “Қостанай таңы” газеті қызметкерлерін марапаттауға арналған салтанатты іс-шара өтті.
Редакция басшылығының бастамасын өңірдегі белгілі тұлғалар, ардагер журналистер және кәсіпкерлер қолдап, қаржылай демеушілік жасады. Әуелі бір топ қызметкер басылымның бас редакторының Алғыс хатын және ақшалай сыйлық иеленді. Олардың қатарында газет тілшілері, дизайнерлері, редакция жанындағы әлеуметтік-эмпирикалық зерттеу орталығы және өңірлік коммуникациялар қызметінің қызметкерлері бар. 
Бұдан соң “Қостанай таңының” ардагер журналисі Қанат Аужанов әулетінің атынан тағайындаған Сәлім Меңдібай атындағы сыйлық, Әйелдер күштері альянсының Қостанай облысы филиалының төрайымы Римма Бектұрғанова тағайындаған сый-тарту, Сарыкөл ауданындағы «Нұр-Айгер-СК» ЖШС директоры Серікбай Жұмағұлов бөлген, “Алюминстрой” ЖШС директоры Абай Мұқанов тарту еткен ақшалай жүлделер өз иелерін тапты. Қостанайдағы 6697 әскери бөлімі командирінің Алғыс хаты бас редактордың орынбасары Аслан Қанғожинге табыс етілді. 
Сондай-ақ, журналистика майталманы Еренғайып Әбдіхалықов атындағы сыйлықтардың иегерлері анықталды. Белгілі тұлғаның баласы, «Нұр Қазақстан» қажылық компаниясының президенті Амангелді Еренғайыпұлы тағайындаған қаржылай сыйлықтар үш бірдей әріптесімізге табыс етілді.
Мұның сыртында, арнайы комиссия алдын ала жабық байқау өткізген болатын. Комиссия мүшелерінің ортақ шешімімен, Амангелді Еренғайыпұлы ұсынған ҰМРА ҚАЖЫЛЫҚ жолдамасы газетіміздің тілшісі Қыдырбек Қиысханға табыс етілді. 
Салтанатты іс-шарада ұзын саны жиырмадан астам қызметкер марапат иеленді. Рәсім соңы мерекелік шай дастарханымен аяқталды. Мерекелік салтанатты әсем ән-күймен көмкеріп, көпшілікке көтеріңкі көңіл-күй сыйлаған облыстық Көркемөнерпаздардың халық шығармашылығы мен кинобейеқор орталығы басшылығына және өнерпаздарға ұжымымыздың атынан ерекше алғысымызды білдіреміз!
Толығырақ газетіміздің алдағы санынан оқи аласыздар.
Суреттерді түсірген Бағдат АХМЕТБЕКОВ, Бердіболат КӨРКЕМБАЕВ