Жаңа жылдың бірінші күні жауған қарға байланысты қаланың коммуналдық қызметтері күшейтілген жұмыс режиміне ауыстырылды.
Көлік кептелісін болдырмай, қалыпты жүруін қамтамасыз ету үшін қардан тазалау жұмыстары сағат 20:00-ден басталды. Қала көшелерін тазалауға 72 арнайы техника жұмылдырылды. Оның бесеуі – құм себетін техникалар.
“Жол қызметтері кәдімгі алгоритм бойынша жұмыс істейді. Біріншіден, орталық көшелер мен әлеуметтік нысандардың кіреберістері, екіншіден, қосалқы көшелер мен кварталішілік автокөлік жолдары тазартылады. Жол қызметтерінің жұмысы ауа райы жағдайларын ескере отырып реттелетінін атап өткім келеді”, – деп жазды бұл туралы Қостанай қаласының әкімі Марат Жүндібаев әлеуметтік желідегі парақшасында.
Қала тұрғындары мен қонақтарын жол қауіпсіздігі ережелерін сақтауға және қолайсыз ауа райы жағдайында ерекше сақ болуға шақырады.