Облыстық Төтенше жағдайлар департаментінің өртке қарсы қызметінің гарнизонына жаңа заманауи 15 техника берілді. Қызметтік көліктер облыс аудандарына жөнелтілді. Кілт тапсыру салтанаты Қостанай қаласының №1 мамандандырылған бөлімшесінің аумағында өтті.
Тапсырылған техника қатарында үш өрт сөндіру машинасы, екі авариялық-құтқару автокөлігі және Toyota Hilux маркалы 10 жедел-жеңіл автокөлік бар. Облыс әкімі Құмар Ақсақалов жыл сайын қажетті жабдықтар сатып алуға қомақты қаржы бөлініп отырғанын атап өтті. Соңғы үш жылда өрт-техникалық және құтқару жобдықтарына 397 млн теңгеден астам қаржы жұмсалған.
“Тілсіз жауды ауыздықтап, адам өмірін сақтау мақсатымен биыл да жаңа көліктер әкелінді. Атап айтар болсақ, 591 млн теңгеге 3 өрт сөндіру автоцистернасы, 2 авариялық құтқару көлігі мен жедел әрекет етуге арналған 10 жеңіл көлік сатып алынды. Қызметтік автокөліктер сала мамандарының қызметін тиімді атқарып, адам өмірін сақтауда жылдам әрекет етуге ықпал етері анық”, – деді Қостанай облысының әкімі Құмар Ақсақалов.
Қарасу аудандық Төтенше жағдайлар бөліміне Toyota Hilux маркалы жедел-жеңіл автокөлігі берілді. Бұл қызметкерлердің өз міндеттерін одан әрі сапалы орындауға ықпал етеді. 
“Жедел, жеңіл көлік шақыртуға тез баруға мүмкіндік береді. Құтқару жағдайын қатысуға өте ыңғайлы. Қысы-жазы ауа райының тосын мінезіне төтеп бере алады. Өздеріңіз білесіздер, биыл су тасқыны кезеңі өте қауырт болды. Десек те өзімізге жүктелген міндетті атқарып шықтық. Қарасу ауданыда 300-ден астам адамды алдын ала эвакуацияладық. Қазір күн райы ыстық, өрт қаупі бар. Қауіпсіздік жұмыстары атқарылуда. Елді мекендерді аралап өрттің алдын алу іс-шараларын өткізіп жатырмыз. Бөлімге көлік дер кезінде берілді деп есептеймін”, – дейді Қарасу ауданының төтенше жағдайлар бөлімінің басшысы, азаматтық қорғау подполковнигі Сейтсаруар Көлбаев.
Салтанатты жиында Қостанай облысы ТЖД ардагерлер кеңесінің төрағасы Александр Мельников қызметкерлер атынан әкімдік қамқорлығына ризашылығын білдіріп, алғыс айтты.
Сералы МЫРЗАБАЙ
Суреттерді түсірген – Бердіболат КӨРКЕМБАЕВ