Қостанай облысының әкімі Құмар Ақсақалов жұмыс сапарымен Қарасу ауданына барып, әлеуметтік жобалардың жүзеге асу барысымен танысып, тұрғындармен кездесті.
Сапар барысында ол Мемлекет басшысының Жолдауына сәйкес, ауылдық жерлерді дамытудың маңыздылығын атап өтті.
Биыл ауылдық елді мекендерді дамытуға 100 миллиард теңгеге жуық қаржы бөлінді, бұл өткен жылмен салыстырғанда 28%-ке артық. Бұл өзгерістердегі бизнестің рөліне ерекше назар аударылды.
Ленин ауылындағы «Бірлік-Өмір» ЖШС қызметі жоғары әлеуметтік жауапкершіліктің мысалы болып саналады. Компания өз қызметкерлеріне үй салып қана қоймай, жергілікті тұрғындар үшін жайлы және қауіпсіз өмір сүру қамын жасап отыр. Тұрғын үй құрылысына 245 миллион теңге, хоккей кортының құрылысына 32 миллион теңге бөлу арқылы «Бірлік-Өмір» ЖШС бизнестің әлеуметтік өзгерістердің қозғаушы күшіне айналып, ауылдың жарқын болашағын қамтамасыз ете алатынын көрсетуде.
«Еңбек өнімділігінің артуы ауыл тұрғындарының өмір сүру жағдайына тікелей байланысты. Мемлекет пен бизнестің міндеті – тиісті жағдай жасау», – деп атап өтті Құмар Ақсақалов.
Қостанай облысы елімізде бірінші болып су тасқыны салдарын жою жұмыстарын аяқтап, 1 280-ден астам зақымданған үйді қалыпқа келтірді. Қарасу ауданында құны 438 миллион теңгеге ұзындығы 14 шақырымнан асатын су бұру арнасы салынды. Бұл – су тасқынының алдын алу және ауылшаруашылық алқаптары мен үйлерді сақтау жолындағы маңызды қадам.
Осылайша, мемлекет пен бизнестің бірлескен күш-жігері ауыл тұрғындарының өмір сүру деңгейін көтеріп, дамытудың қуатты катализаторы ретінде қызмет етеді. Бұл жай ғана инвестиция емес, бұл – әрбір ауыл тұрғыны өзін қорғалған және сенімді сезінетін болашаққа қосқан үлес.
Облыс әкімі аудан тұрғындарымен кездесу өткізді. Оның аясында әуелі аудан әкімінің жыл басынан бері атқарылған жұмыс туралы қорытынды есебі тңдалып, кейін Құмар Іргебайұлы өңірдегі ахуал, алға қойылған мақсат-міндеттер жөнінде баяндама жасады. 
Суреттерді түсірген – Бердіболат КӨРКЕМБАЕВ