V Дүниежүзілік көшпенділер ойындарында Қостанай облысының өнерпаздары тамаша концерттік бағдарлама ұсынады.
Айтулы іс-шарада белгілі күйші, Қазақстанның еңбек сіңірген қайраткері Анар Мұздаханова, Е.Өмірзақов атындағы облыстық филармонияның Н.Молдахметов атындағы қазақ халық аспаптар оркестрі, «Костанайские зори», «Карнавал» би ұжымдары бастаған халықаралық, республикалық байқаулардың лауреаттары, өңіріміздің танымал әншілері өнер көрсетеді.
Концертте Қостанай облысынан шыққан композиторлардың шығармалары мен әйгілі сазгерлердің Тобыл-Торғай өңірі туралы жазған туындыларына басымдық берілмек. Негізінен – көшпенділік дәстүрі мен этнографиялық стиль дәріптеледі.
Концерттік бағдарлама Астана қаласындағы «Қазанат» ипподромында 12 қыркүйекте сағат 12.00-де басталады.
Бұдан бөлек, сағат 14.00-де «Шаңырақ» этно шатыр бағдарламасы аясында ақындар айтысы өтеді. Аймағымыздың намысын Айтыстың ақтаңгері Айбек Қалиев бастаған жыр дүлдүлдері қорғайды.