Мемлекеттік қызметшілер, депутаттар, журналистер мен қоғамдық кеңес мүшелері қатысқан бұл турнир ежелгі ойынды сүйетіндер үшін нағыз мерекеге айналды. Ақыл-ой, төзімділік пен стратегиялық ойлау қабілетін айқындайтын шахмат бәсекесі көпшіліктің қызығушылығын тудырды.
Турнирге қатысушылар қатарында Науырзым ауданынан келген Қарамеңді ауылдық округі әкімі аппаратының бас маманы Мұрат Хамза да болды. Шахматты тек әуесқой деңгейде ойнаса да, Мұрат өз ауданын лайықты түрде таныстырып, бұл ойынға деген шынайы қызығушылық пен табандылық әсерлі нәтижелерге жетелей алатынын дәлелдеді.
– Ауданымызда өтіп жатқан шахмат турнирлеріне мүмкіндігінше тұрақты қатысуға тырысамын, – деп бөлісті әсерімен Мұрат Темірұлы. – Шахматқа деген қызығушылығым бала кезден басталды, алғашқы ұстазым – әкем болды. Бұл ойын абстрактылы ойлауды дамытып, стратегиялық жоспар құру мен жедел шешім қабылдауға үйретеді – бұл қабілеттер кәсіби қызметте де өте маңызды.
Шахматпен кәсіби айналыспаса да, кадр бөлімі тарапынан түскен шақыртуды Мұрат қуанышпен қабылдап, бар ынтасымен дайындалды. Нәтижесінде ол жалпы рейтинг бойынша 11-орынды иеленіп, мемлекеттік қызметшілер арасындағы жарыста 1-орынға ие болып, абсолютті жеңімпаз атанды.
Бұл жеңіс – Мұрат Хамзаның жеке жетістігі ғана емес, Науырзым ауданының да абыройы. Ол шынайы қызығушылық пен еңбектің кез келген саладан табыс әкелетінін, тіпті күрделі интеллектуалдық ойын – шахматта да биік белестерді бағындыруға болатынын айқын көрсетті.
Айтолқын Айқадамова
Науырзым ауданы