Ертең Футболдан УЕФА Конференция Лигасының үшінші іріктеу кезеңінде Қостанайдың “Тобылы” солтүстік ирландиялық “Дерри Сити” командасын қабылдайды.
“Тобылдың” бас бапкері Милич Чурчич осы ойын алдындағы журналистердің сауалдарына жауап берді.
“Ертеңгі қарсыласымызды зерделеп, дайындық жұмысымызды жүргізіп жатырмыз. Ойындары ағылшын стиліне келеді. Көбінесе алыс пастарға иек артып, құрамында стандарттарды жақсы орындайтын тәжірибелі ойыншылар бар. Кез келген жағдайға дайын болғанымыз жөн. Ешкімге еліктеп, не ағылшынша, не Еуропаның басқа түріндегі ойын стилін таңдамаймыз, біз қашанда өз ойынымызды көрсетуіміз керек!”, – деді бас бапкер.
Бұл жолы баспасөз мәслихатына қатысқан команда қорғаушысы Бағдат Қайыров ертең кездесу оңай болмайтынын айтты.
“Бас бапкердің айтқанына қосыламын, ертең бізді қиын ойын күтіп тұр. Алаңда барымызды саламыз. Жанкүйер қауымның үлкен қолдауы қажет”, – деді ол.
Суреттер “Тобыл” футбол клубының ресми сайтынан алынды