Бүгін облыс әкімдігінде тәуелсіздік жылдары облыс экономикасын өркендетуге елеулі үлес қосқан еңбек ардагері Әлия Нұрышқызы Қайшарованың туғанына 70 жыл толуына байланысты сый-құрмет көрсетілді.
Облыс әкімінің орынбасары Ринат Мұхаметқали салтанатты басқосуда мерейтой иесіне облыс әкімі Құмар Ақсақаловтың Алғысхатын тапсырып, сый-сияпатын жасады.
Әлия Нұрышқызы – Қарасу ауданының тумасы. Мамандығы бойынша бухгалтер болып еңбек жолын бастаған білікті маман өзінің ақ-адал еңбегімен көзге түсіп, талай белестерден көрінді.
Қостанай облыстық тұтынушылар одағында, мемлекеттік мүлік комитетінде, салық инспекциясында жауапты қызметтерді абыроймен атқарды. Әсіресе, өткен ғасырдың 1995-1998 қиын-қыстау кезеңіде Ә.Қайшарова облыс әкімінің орынбасары қызметінде табанды жұмыс атқарды. Өңір экономикасын күйзелістен аман алып шығуға айтарлықтай күш-жігер жұмсады. Еңбегі елеусіз қалған жоқ. Оған Әлия Нұрышқызының көзкөрген замандастарының берген бағасы, сондай-ақ алған марапаттары куә. Ел Президентінің Алғыс хаттарын, «Құрмет» орденіне бастап, көптеген медальдар, құттықтау-марапаттау белгілері бар.
Қадірлі ардагер бақытты отбасының анасы. Ұл-қызын өсіріп-өндіріп, немерелерінің қызығына бөленіп отыр.
Әлия Нұрышқызы әлі де еңбектен қол үзген жоқ. ҚР Тұңғыш Президенті – Елбасы қорының атқарушы директорының кеңесшісі қызметін абыроймен атқаруда. Қостанайлық жерлестеріне қолдан келген көмегін аямай тер төгіп жүрген аяулы абзал жан. Былтырғы Аманқарағай өрті кесепатына қарсы күресте, биылғы су тасқыны кезінде де алғашқылардың қатарында қол созғанын айтсақ та жеткілікті.
Кездесуге қатысқан Ә.Қайшарованың кезіндегі әріптестері: бүгінде облыстық қоғамдық кеңестің төрағасы Серік Бектұрғанов, ҚР Жазушылар одағының облыстағы өкілі Жанұзақ Аязбеков, Облыстық ардагерлер ұйымының төрағасы Батырбек Ахметов, облыстық медициналық сақтандыру қоры төрағасының орыбасары Сәуле Айтмұхамбетова және кәсіпкер Нағима Жүсіпбекова сөз сөйлеп, Әлия Нұрышқызының өмір және еңбек жолынан естеліктер айтты.