Бұл алаң Абай даңғылы №90,92, Байтұрсынов көшесі №20, Маясова көшесі №29, 31 үйлердің тұрғындары үшін іске қосылды.
Бұған дейін Арқалық қаласындағы шағын аудандар мен кенттерде бұқаралық спортты дамытуға бағытталған осындай 14 спорт алаңы мен көше тренажерлары халық игілігіне берілген еді.
«Дені сау ұлт – еліміздің мемлекеттік саясатының басты басымдықтарының бірі. Бұқаралық спортпен шұғылдану үшін жағдай жасау біз үшін маңызды міндет. Бұл нысанда жасанды футбол алаңы төселіп, аумағы қоршалып, жарықтандырылды. Алдағы уақытта жоспарға сәйкес тұрғындардың спортпен шынығуына қажетті 10 көше тренажерлары орнатылатын болады», – деді қала әкімінің орынбасары Мешітбай Жұманов.
Жаңа спорт алаңының лентасын Президенттік көпсайыстан қала құрама командасының мүшесі, жеңіл атлетикадан қалалық жарыстардың жеңімпазы, ел ағасы Бейсенбай Сандыбаев пен футболдан Қостанай облысының күміс жүлдегері, облыстың үздік қақпашысы, қалалық балалар-жасөспірімдер спорт мектебінің шәкірті Данияр Жолдыбай қиып берді.
Ұлттық дәстүрімізге сай шашу шашылып, аула балаларына ала доптар сыйға тартылды.
«Байтұрсынов көшесі №20 үйдің тұрғынымын. Бүгінгі ашылып жатқан жаңа футбол алаңының ашылуына дән ризамыз. Бұған дейін ауланың балалары құмда шаңдатып ойнап жүретін еді. Қала басшылығына, спорт және дене шынықтыру бөліміне зор алғысымызды білдіреміз», – дейді қала тұрғыны Жарас Қуанышбекұлы.
Қалада қазір 1 стадион, 50 спорт залы, 15 футбол алаңы, 11 көше тренажерлері жұмыс істейді.
Мұрат Жүнісұлы
Суреттерді түсірген-автор
Арқалық қаласы