Арқалық жастарының «Алтын кітабы» жобасы әр салада ерекше жетістіктерден көрініп, республикалық және әлемдік дәрежеде жеңіске жеткен азаматтардың көрсеткіштерін мәлім ету үшін іске асырылып келеді. 2011 жылдан бастау алған жоба тарихында бұл кітапқа Арқалық өңірінің түкпір-түкпірінен 130 жастың есімі еніп отыр.
«Алтын кітап-2023» лауреаттарын қала әкімі Әмірхан Асанов құттықтап, марапаттады.
Атап айтқанда, «Білім» номинациясы бойынша Арқалық политехникалық колледжінің өндірістік оқыту шебері Алексей Руденко, Ы. Алтынсарин атындағы гимназияның мұғалімі Нұржанат Байғуатова, «Спорт» номинациясы бойынша Ы.Алтынсарин атындағы гимназия оқушысы Александр Шпилевой, Арқалық политехникалық колледжінің оқытушысы Бақдәулет Ералы, Арқалық көпсалалы колледжінің студенті Жансая Кабимуллина, «Мәдениет және өнер» номинациясы бойынша Арқалық қаласындағы «Дала өлкесі тарихы» облыстық музейінің ғылыми қызметкері Ернұр Әуезхан, «Кәсіпкерлік» номинациясы бойынша жеке кәсіпкер Таңшолпан Серікбай, «Денсаулық сақтау» номинациясы бойынша қалалық «Жанұя» медициналық орталығының дәрігері Айдана Омарбекова, «Жас көшбасшы» номинациясы бойынша Арқалық медициналық колледжінің студенті Алтынай Сейдеғалиева, «Жас ғалым» номинациясы бойынша Ы.Алтынсарин атындағы Арқалық педагогикалық институтының магистрі Меруерт Қасқырбаева, «Ерекше қоғамдық белсенділігі үшін» номинациясы бойынша Н.Құлжанова атындағы Торғай гуманитарлық колледжінің Луиза Ақылбековалар марапатталды.
Сондай-ақ, «Үздік еріктілер ұйымы – 2023» байқауының жеңімпаздары, кәсіптік оқу орындарының белсенді еріктілер ұйымдары және мемлекеттік жастар саясатын жүзеге асыруға ерекше үлес қосқан жастар қала әкімінің Алғыс хатына ие болды.
Алтын жастардың құрметіне қала өнерпаздары ән мен жырдан шашу шашты.
Мұрат ЖҮНІСҰЛЫ
Суреттерді түсірген автор
Арқалық қаласы