Халықаралық жастар күнін жоғары деңгейде мерекелеуге арналған кешенді іс – шаралар онкүндігі Арқалық қаласында да жастардың жарқын істерімен ерекшеленуде.
Атап айтқанда: «Jasyl Marathon’24» бағыты бойынша қалаға қарасты «Восточный» тірек ауылының жастары мен еріктілері ауылда тазалық жұмыстарын жүргізіп, 10 тонна қоқыс шығарды.
«Aspan Cinema» бағытында Ә.Боранбаев атындағы кинотеатрда қала және ауыл жастарына Алаш ардақтысы М. Дулатұлының «Оян Қазақ» фильмі көрсетілді. Қалалық Ішкі саясат бөлімі Жастар ресурстық орталығының еріктілері Арқалық өңірлік ауруханасында донорлық мақсатта қан тапсырды және өңір жастарымен мектеп оқушылары арасында «Ұлттық ойын-халық мұрасы» атты ұлттық спорттық сайыстар, сонымен қатар «Интеллект батл» сайысы, «Шахмат турнирі», «Jastar-X» форматында мотивациялық кездесу, «Enbek Fest’24» бос жұмыс орын жәрмеңкелері өткізілді.
Сондай – ақ, «Абай күніне» орай қазақтың бас ақыны, ұлы ойшыл А. Құнанбайұлының өлеңдерін мәнерлеп оқу, «Болашағың өз қолыңда» атты полиция қызметкерлерімен рейд, «Оpen air» форматында меркелік концерт және би кеші өтеді.
«Барша жастарды, айтулы мереке – Халықаралық жастар күнімен шын жүректен құттықтаймын. Жастық шақтың күш – қайратын тәуелсіз елімізді өркендетуге жұмсай берейік. Жастарымыздың өз мүмкіндіктерін барынша пайдаланып, зор жетістіктерге қол жеткізіп, биік белестерден көріне берулеріне тілектеспіз», – дейді қалалық Жастар ресурстық орталығының басшысы Данияр Қожахметов.
Мұрат Жүнісұлы
Арқалық қаласы