Қостанай облысында инклюзивті спортты дамыту сапалы жаңа деңгейге көтеріліп келеді, өйткені паралимпиадалық бочча тәртібі өңірде жоғары қарқын алуда. Алайда, ұзақ уақыт бойы республикалық біріншіліктерде облыс намысын қорғауға ұмтылған ерекше спортшылар елеулі инфрақұрылымдық кедергіге тап болып келді.
Жаттығу залының отыз жылдан астам уақыт бойы жөндеу көрмеген төсеніші кәсіби жаттығу процесін іс жүзінде мүмкін емес етті. Бочча – бұл жекпе-жектің тағдырын миллиметрлер шешетін зергерлік дәлдік спорты, ал терең жарықтары мен бұдырлары бар ескі, деформацияланған еден доптың қозғалыс траекториясын үнемі өзгертіп отыратын.
Нәтижесінде, спортшылардың жаттығудағы көп айлық еңбегі төсеніштің сапасыздығынан еш кететін.
«Мұндай жағдайда толыққанды кәсіби жаттығулар туралы айтудың өзі артық еді. Еденнің ақауларына байланысты доп үнемі бағытынан ауытқып кететін. Бұл балалардың ынтасын төмендетті. Енді жағдай түбегейлі өзгерді. Біз тек жаттығып қана қоймай, халықаралық деңгейде қалалық және облыстық іріктеу жарыстарын өткізе аламыз», – деп атап өтті боччадан Қостанай облысының аға жаттықтырушысы Валентина Исмурзина.
Мәселенің жылдар бойы шешілмей келе жатқанын түсінген ата-аналар комитеті мен жаттықтырушылар құрамы «AMANAT» партиясының қоғамдық қабылдау бөлмесіне жүгінді. Азаматтардың өтінішін егжей-тегжейлі зерделеу үшін жаттығу залына партиялық бақылау өкілдері мен «AMANAT» партиясынан облыстық мәслихат депутаты Серік Манасбаев жедел барды. Төсенішті тексеріп, тозған едендегі ойынның ерекшелігін бағалаған ол мәселенің шешілуін депутаттық бақылауға алды. Партияның бейінді мемлекеттік органдармен үйлесімді өзара іс-қимылының арқасында жағдай қысқа мерзімде өзгерді.
Бірнеше аптаның ішінде залда ауқымды жұмыстар кешені жүргізілді: мамандар ескі төсенішті толық демонтаждап, қатаң халықаралық стандарттарға сәйкес келетін заманауи, мінсіз тегіс паркет төседі, сондай-ақ кәсіби таңбалау жүргізіп, жарықтандыру жүйесін айтарлықтай жақсартты.
Бүгінде жаңартылған кедергісіз залда 25 жас қостанайлық шұғылданады. Олардың арасында «цеберальды сал ауруы» диагнозына қарамастан, боччадан спорт шебері нормативін орындап, Қазақстан чемпионатының күміс жүлдегері атанған 23 жасар Ольга Кунцевич бар.
«Бочча Ольганың логикасын, тактикалық ойлауын және қозғалыс координациясын дамытуға орасан зор көмектеседі. Енді еден мінсіз болған кезде, барлық балалардың көздерінде от жанды. Ынтасы бірнеше есе артты, біз тек медальдарды мақсат тұтып отырмыз», – дейді спортшының анасы Валентина Кунцевич.
Қазір жаңартылған зал толық қуатында жұмыс істеп тұр және қостанайлық бочча шеберлері маусымның басты старты – ағымдағы жылдың 1 шілдесінде басталатын Қазақстан Республикасының Чемпионатына қарқынды дайындық жүргізуде.
Мұндай қолдау «AMANAT» партиясының сайлауалды бағдарламасы мен «Кедергісіз келешек» партиялық жобасының дәйекті түрде іске асырылуының жарқын мысалы болып табылады. Партия халықтың нақты сұраныстарына жедел үн қатып, оларды ерекше спортшыларға үлкен спортқа тікелей жол ашатын жүйелі шешімдерге айналдыруда.
Сандуғаш БЕКМҰРАТ
Суреттерді ұсынған – «AMANAT» партиясының баспасөз қызметі