Прогрессивті қоғамға қол жеткізу үшін азаматтардың дүниетанымын өзгерту және жаңа құндылықтарды қалыптастыру қажет. Осыған байланысты Мемлекет басшысы Қасым-Жомарт Тоқаев Ұлттық құрылтайда «Адал азамат» тұжырымдамасын енгізудің маңызды екенін айтқан. Ақсақалдар кеңесі бұл ұсынысты іліп әкетіп, арнайы жобаға бастамашы болды.
Сөйтіп Ақсақалдар кеңесінің бастамасымен «Адал азамат» жобасы өмірген келген. Негізгі ұстанымы: жастарды патриотизмге тәрбиелеу, жаман әдеттерге тәуелділік, ысырапшылдық сияқты келеңсіздіктермен күрес, бірлікті, татулықты насихаттау.
Міржақып Дулатов атындағы Қостанай инженерлік-экономикалық университетінің базасында Қазақстан халқы Ассамблеясы жанындағы Ақсақалдар кеңесінің ұйымдастыруымен аймақтық семинар-тренинг өтті. Қазақстан халқы Ассамблеясының 30 жылдығы аясында өткен іс-шараға қала және аудандық Ақсақалдар кеңесінің төрағалары қатысты.
Дөңгелек үстел барысында жастарды патриотизмге және рухани-адамгершілік құндылықтарға тәрбиелеуді мақсат еткен «Адал азамат» жобасының жүзеге асырылуы талқыланды. Бұл бастама адалдық, әділдік, әлеуметтік жауапкершілік, еңбекке құрмет және мәдени мұраны сақтау қағидаттарын дәріптеуге бағытталған.
Қазақстан халқы Ассамблеясы жанындағы облыстық Ақсақалдар кеңесінің төрағасы, Ахмет Байтұрсынұлы атындағы Қостанай өңірлік университетінің профессоры Қалқаман Жақып кездесудің маңызына тоқталып, өңірде жүзден астам этнос бейбітшілік пен келісімде өмір сүріп жатқанын атап өтті.
«Этносаралық келісім мен халық бірлігін нығайту – қоғамдағы тұрақтылықтың негізгі кепілі. Біздің міндетіміз – жастарға осы құндылықтарды сіңіру. Ақсақалдар әрдайым елдің рухани тірегі болып келді. Біз ұлттық дәстүрлер мен мәдениетті сақтау арқылы келер ұрпаққа дұрыс бағыт-бағдар беруіміз керек», – деді Қалқаман Жақып.
Ақсақалдар кеңесінің жұмысын үйлестірушісі Айбек Таңатбаев ұйымның өскелең ұрпақты тәрбиелеудегі рөлін және оны қолдау механизмдерін баяндады. Ал кеңес мүшесі, Қазақстан Жазушылар одағының мүшесі Жанұзақ Аязбекұлы жастарды адалдық пен әділдікке баулу мәселесін Ұлттық құрылтайда көтерілген Президенттің тапсырмалары аясында қарастыру қажет екенін айтты.
«Жастардың әлеуетін дұрыс пайдаланса, олардың атқарар қызметі орасан. Оларға ақыл айтудан гөрі, жұмысты сеніп тапсырғанымыз абзал. Қиыс кетсе бағыт-бағдар сілтеп отыр», – дейді Жанұзақ Аязбекұлы.
Семинарда әр өңірдің өкілдері тәжірибелерін бөлісті. Рудный қаласы Ақсақалдар кеңесінің төрағасы Жаңбыршы Тілеуғабылов жастардың еңбекке деген құрметін арттыру қажеттігін алға тартты.
«Жастардың болашағы – олардың еңбекқорлығында. Біз оларға мамандық таңдауда дұрыс бағыт беріп, еңбек адамының беделін көтеруіміз керек. Ақсақалдар ретінде біздің міндетіміз – олардың дұрыс жол таңдауына көмектесу», – деді Жаңбыршы Тілеуғабылов.
Семинарға қатысушылар «Адал азамат» жобасы аясында өскелең ұрпақты тәрбиелеу жұмысын күшейту қажеттігі туралы ортақ шешім қабылдады.
Қонақтар университеттің заманауи зертханаларымен, Міржақып Дулатовтың 140 жылдық мерейтойына орай жүзеге асырылып жатқан жұмыстарымен танысты.
«Бұл семинар біз үшін маңызды тәжірибе алмасу алаңы болды. Ақсақалдар қоғамның рухани тірегі ретінде әрдайым жастарға дұрыс бағыт сілтеуі керек. Қостанай облысының Қазақстан халқы Ассамблеясы жанындағы Ақсақалдар кеңесі осы бағыттағы жұмыстарын жалғастыра бермек», – деп жиынды қорытындылады Қалқаман Жақып.
Аслан ЖАҚСЫЛЫҚҰЛЫ