Қытай Халық Республикасының Сучжоу қаласында 12-20 шілде аралығында өткен экономикадан халықаралық олимпиадада (International Economics Olympiad, IEO 2026) қазақстандық оқушылар жоғары нәтиже көрсетті. Әлемнің 61 елінен 300-ге жуық дарынды оқушы қатысқан беделді білім додасында Қазақстан құрамасы бір алтын, үш күміс және бір қола медаль жеңіп алды.
Атап айтқанда, Астана қаласы Нұра ауданындағы NIS-тің 11-сынып оқушысы Батырхан Мұхтархан алтын медаль жеңіп алып, халықаралық экономика олимпиадасының екі дүркін алтын жүлдегері атанды.
Алматы қаласы Медеу ауданындағы NIS-тің 11-сынып оқушылары Дінмұхаммед Кемелов пен Альтаир Жапаров, Алматы қаласындағы «Мирас» халықаралық мектебінің 11-сынып оқушысы Аружан Сұлтанбек, күміс медаль иеленсе, Алматы қаласы Медеу ауданындағы NIS-тің 10-сынып оқушысы Темірлан Қуанышбек қола медальді жеңіп алды.Ұлттық құраманы «Teenvestor» мектебінің директоры, ұлттық құрама жаттықтырушысы Руслан Мулдашев және «Дарын» республикалық ғылыми-практикалық орталығының әдіскері Зере Жарлагапова дайындады.
Қазақстандық оқушылардың бұл жетістігі елімізде дарынды жастарды қолдау және оларды халықаралық олимпиадаларға жүйелі даярлау жұмысының нәтижесін көрсетті. Әлемнің 61 елінен жиналған үздіктер арасындағы табысты өнер көрсету қазақстандық оқушылардың экономика, қаржы және бизнес бағыттары бойынша халықаралық деңгейдегі бәсекеге қабілеттілігін тағы бір мәрте дәлелдеді.Халықаралық экономика олимпиадасы (International Economics Olympiad, IEO) — экономика, қаржы және бизнес саласындағы дарынды мектеп оқушыларын біріктіретін әлемдегі ең беделді зияткерлік жарыстардың бірі. Олимпиада барысында қатысушылардың экономика, қаржы және бизнес бағыттары бойынша білімі, аналитикалық ойлау қабілеті мен практикалық жағдайда тиімді шешім қабылдау дағдылары бағаланады.