Қостанайдағы «Нехабар», «Панаехали» түнгі клубтары мен «Волна» кафесі қауіпті орындар көшін бастап тұр.
Өңірдегі түнгі клубтар, барлар мен дәмханалар құқық қорғау органдарының ерекше бақылауына алынды. 2024–2028 жылдарға арналған Қоғамдық қауіпсіздікті қоғаммен әріптестікте қамтамасыз ету тұжырымдамасын іске асыру жоспарына сәйкес, Қостанай облысының Полиция департаментінде ойын-сауық орындарында тіркелген құқық бұзушылықтар туралы «102» арнасына түскен шағымдар мен хабарламалар талданды.
Мақсат — тек жекелеген фактілерді анықтау емес, көпшілік демалатын орындарда қылмыстар мен құқық бұзушылықтардың алдын алуға бағытталған жүйелі тәсіл қалыптастыру.
Қай жерлерден жиі сигналдар түседі?
Осы жылдың 10 айында ең көп хабарламалар Қостанай қаласынан келіп түсті. Өткен жылдың осындай кезеңімен салыстырғанда, шағымдар аздап азайғанымен, кейбір орындар полиция шақыру саны бойынша «көш бастап» келеді.
Мысалы, Баймағамбетов көшесінде орналасқан «Нехабар» клубынан осы кезең ішінде 71 шақырту түскен. Көптеген оқиға төбелес, дене жарақаты, әкімшілікпен жанжал және ұрлық фактілерімен байланысты. Бірнеше дерек қылмыстық құқық бұзушылық ретінде тіркелді.
«Панаехали» барынан 53 хабарлама түскен. Мұнда да төбелес, агрессивті келушілерге қатысты шағымдар түсіп, жанжалдар тіркелген.
Қайырбеков көшесіндегі «Волна» барынан 37 шақыру түсіпті. Олар — қақтығыс-кикілжің, тәртіпсіз мінез-құлық, мүлікке зақым келтіру және полиция қызметкерлеріне бағынбау жағдайлары.
Басқа қалалардағы жағдай қалай?
Рудный қаласында полиция көбіне «Джага-Джага» кафесіне сабылған. Бұл жердег 29 хабарлама келіп түсіпті. Олардың басым бөлігі — жанжалдар, қатты музыкаға шағым және түнгі тыныштықты бұзу фактілері.
Арқалық қаласында ең көп назар аудартқан нысан — «Ақарыс» кафесі. Ол жерден төбелес-жанжал және келушілердің тәртіпсіздігіне қатысты шағымдар жиі түсіп тұрады.
Барлық сигнал қылмыстық немесе әкімшілік іс ретінде рәсімделмесе де, олардың жиілігі қоғамдық тәртіп пен қауіпсіздікке төнетін әлеуетті қатер бар екенін көрсетеді.
Қауіпті нысандар рейтингі қалай жасалады?
ІІМ бұйрығына сәйкес, нысандар соңғы үш айдағы арыздар мен шақыртулар санына қарай қауіп деңгейі бойынша жіктеледі:
— Құқық бұзушылықтардың қалыпты ықтималдығы — 10-нан 50-ге дейінгі шағымдар;
— Орта және жоғары ықтималдық деңгейі — 50 және одан көп шағымдар.
Осы критерий бойынша Қостанай облысында «Панаехали» бары, «Нехабар» клубы, «Волна» бары және «Джага-Джага» кафесі «қалыпты қауіп деңгейіндегі» нысандар қатарына енді.
Бұл неліктен маңызды?
Мәселе тек шудың немесе тұрмыстық жанжалдардың өзінде емес. Кейбір жағдайда келушілердің денсаулығы мен өміріне, сондай-ақ мүлікке қауіп төнуі мүмкін. Жекелеген орындарда жанжалдар төбелеске ұласқан, ұрлық және ауруханаға жеткізу жағдайлары жиілеген.
Полиция өкілдері атап өткендей, мақсат — бизнестің жұмысын тоқтату емес, қауіпсіздік пен тәртіпті қамтамасыз ететін орта қалыптастыру. «Антирейтингке» енген нысандар ерекше бақылауда болады.
Тұрғындар не істей алады?
— Қауіп немесе жанжал жағдайларын байқасаңыз, 102 нөміріне хабарласыңыз.
— Егер құқық бұзушылықтың куәсі болсаңыз, қауіпсіз жағдайда деректі фото немесе бейне түрінде тіркеп, орын, уақыт және мән-жай туралы хабар беріңіз.
— Есіңізде болсын: сіздің қырағылығыңыз ауыр зардаптардың алдын алуы мүмкін.
Ойын-сауық орындарын бақылау — демалысқа шектеу қою емес, әрбір адамның қауіпсіз және тыныш ортада демалу құқығын қорғау.
«Мұндай рейтингтер мен профилактикалық шаралар — құрал ғана. Ал негізгі серіктес — қоғамның өзі. Тек полиция, тұрғындар және кәсіп иелері бірлесе әрекет еткенде ғана түнгі демалыс мәдениетін өзгертіп, тәуекелдерді азайтуға болады», — делінеді ПД хабарламасында.
Жанайым Балғынбекқызы,
ҚӨУ студенті