Мемлекет басшысының 2025 жылды жұмысшы мамандықтарының жылы деп жариялауын Қазақстанның еңбек нарығы мен білім беру жүйесін жаңғыртуға бағытталған стратегиялық бастама деуге болады.
Жұмысшы мамандықтарына сұраныс тек өндіріс саласында ғана емес, қызмет көрсету, құрылыс және ауыл шаруашылығы сияқты секторларда да артып отыр. Заманауи экономикада техникалық мамандардың рөлі ерекше маңызды, өйткені олар инновацияларды іс жүзінде жүзеге асыратын негізгі күш болып саналады.
Жұмысшы мамандықтарының жылының тағы бір пайдасы – жастар техникалық білім алудың тиімділігі мен болашағы туралы мол ақпаратқа қанығады. Бұл, әсіресе, еңбекке қабілетті жастағылар үшін маңызды. Қоғамдағы стереотиптерді жойып, бұл мамандықтардың беделін арттыру – негізгі міндеттердің бірі.
Кәсіптік және техникалық білім беруді трансформациялау оқу орындарының инфрақұрылымын жаңартуды талап етеді. Бүгінгі таңда көптеген колледжде заман талабына сай құрал-жабдықтардың жеткіліксіз. Бұл мәселені шешу арқылы студенттердің практикалық дағдыларын жақсартуға қол жеткізуге болады.
Техникалық мамандықтарға көңіл бөлу ел экономикасын әртараптандырудың негізі болуы мүмкін. Жоғары технологиялық өндірістерде жұмыс істейтін техникалық мамандар елдің экспорттық әлеуетін арттыруға және ішкі нарықты нығайтуға серпін берері сөзсіз.
2025 жылдың жұмысшы мамандықтарының жылы деп жариялануы – елдің дамуын қамтамасыз етуге арналған жүйелі әрі болашағы зор бастама. Бұл жоба тек техникалық және кәсіптік білім беру саласын дамытуға ғана емес, сонымен қатар экономикалық тұрақтылық пен халықтың әл-ауқатын арттыруға бағытталған маңызды қадам болмақ.
Байболат СЕГІЗБАЕВ,
ҚХА “Қоғамдық келісім”
мекемесінің бас сарапшысы