Өткен жылы “Самұрық-Қазына Контрак” ЖШС 93 млрд теңгеден астам қаржыға 285 оффтейк-келісім шарт жасаған. Бұл тиімді шарттармен қаржыландырудың басты құралы.
Қор реттелетін сатып алуларда алғашқы болып мұндай келісімшарттарды енгізіп отыр. Кәсіпкерлікті қолдау өңірдің әлеуметтік-экономикалық дамуының басты құралы. Осы бағытта “Самұрық-Қазына” Ұлттық әл-ауқат қоры Қостанай облысының дамуына, жаңа жұмыс орындарының ашылуына және кәсіпкерлерге қажетінше қолдау білдіріп келеді.
Аталмыш Қор “Қостанай облысында кәсіпкерлікті дамыту” тақырыбында өңірдік бизнес-қауымдастығының қатысуымен конференция ұйымдастырды. Жиында отандық өнім түрлерін көбейту және жергілікті қамтуды ұлғайту бағытында атқарылып жатқан жұмыстар баяндалды. Жиында сөз алған “Самұрық-Қазына Контракт” ЖШС Бас директорының орныбасары Дархан Рамазанов қолға алған бағдарламалар тиімділігін атап өтті.
– Отандық өндірушілерді қолдаудың пәрменді тетіктерінің бірі – Қазақстанда жаңа өндірістер құруды ынталандыратын импортты алмастыратын атап өткім келеді. Бұл бағдарлама өндірілетін өнім түрлерінің қатарын кеңейтуге, жергілікті қамтуды ұлғайтуға ықпал етеді. Осылайша, импортты алмастыру бағдарламсын қолға алғаннан бері 2018-2022 жылдар кезеңінде 93 млрд теңгеден астам қаржыға 285 оффтейк-келісім шарт жасалды,– деді ол.
Мемлекет басшысы Қасым-Жомарт Тоқаев қордық сатып алу жүйесін жетілдіру жөнінде тапсырма берген болатын. Осының шеңберінде “Атамекен” палатасымен бірлесіп Қордың сатып алу жүйесіне елеулі өзгерістер еңгізілген.
– Біріншіден, барлық құжаттар біріздендірілді. Енді 9 көп деңгейлі құжаттардың орнына барлық рәсімдердің сипаттамасын қамтитын бірыңғай тәртіп бекітілді, – деп атап өтті спикер.
Конференцияның жекелеген бөлігінде оқыту семинарлары өтті. Қор сарапшылары отандық өндірушілерді қолдау жолдарымен таныстырды. Алдын ала біліктілікті іріктеу тетігі туралы және Қордың сатып алуларына қатысу жолдары туралы айтып берді.
Жиын қорытындысы бойынша “Самұрық-Қазына Контракт” ЖШС Қостанай облысының әкімдігі және “Атамекен” ҰКП кәсіпкерлер ұлттық және өңірлік маңызы бар бірлескен жобаларға белсенді қатысуға әзір екенін жеткізді.
Сералы МЫРЗАБАЙ
Суретті түсірген Бағдат АХМЕТБЕКОВ