Қостанай қаласында балалар шығармашылық үйінде облыстық «Шекарасыз балалық шақ» фестивалінің іріктеу кезеңі өтті. Үздіктер Астана қаласында өтетін «Жұлдызай» балалар шығармашылығының ХІХ республикалық фестиваліне жолдама алды. Бұған Тобыл өңірінің түкпір-түкпірінен келген жетпіске жуық ерекше балалар қатысты.
«Бұл фестиваль 2004 жылдан бері қолға алынды, биыл жиырмасыншы рет өткізіліп отыр. Елімізде дәстүрге айналған бұл шараның мақсаты – ерекше қажеттілігі бар балалар мен жасөспірімдердің шығармашылық қабілетін, әлеуметтік белсенділігін дамыту, қоғамдық ортада өздерін еркін сезінуге көмектесу болатын. Фестиваль барысында қатысушылар «Вокал», «Хореография», «Ым-ишаратпен ән айту», «аспапта ойнау» номинациялары бойынша өнерлерін ортаға салды. Осы фестивалден танымал болған ерекше балалар да бар. Ең алғаш 2005 жылы «сурет салу» бағыты бойынша Анар Абжан атты қыздың бағы жанып, гран-при иегері атанды. Қазір әлемге танымал суретші. Сонымен қатар, аталған фестиваль жеңімпазы көзі зағип Кенжебек Нұрдолдай есімді жігіт танымал әнші», – дейді «Жұлдызай» корпоративті қорының өкілі Жаннұр Көшербай.
Фестивальға ерекше балалар ата-аналарының сүйемелдеуімен түрлі аудан-қалалардан келді, олар өткізілген іс-шарадан алған әсерлерімен бөлісті.
«Біз осындай ауқымды фестивальға алғаш рет ерекше балаларды қолдау мақсатында қатысып отырмыз. Мұндай кездесулер пайдалы. Себебі сахнаға шығады, таланттары ашылады. Біздің балаларымыз үшін осындай іс-шараларды өткізу соншалықты жағымды эмоциялар береді, олармен бірге қуанасың», – дейді олардың ата-аналары.
Сарыкөл ауданынан келген Нұрхан Искаковқа осындай ауқымды шараларға қатысқан ұнайды.
«Мен бүгін домыра аспабында қазақтың «Жалқы жігіт» күйін орындап беремін. Бес жылдан бері үйірмеге қатысып келемін. Маған гала концертке қатысқан ұнайды. Мен отбасында жалғыз баламын. Мені ата-анам да ерекше жақсы көреді, сондықтан олардың сенімін ақтағым келеді. Оның сыртында күреспен, шахматпен айналысамын», – дейді 5 сынып оқушысы Нұрхан Искаков.
Облыстық бірінші кезеңнен іріктелген балалар республикалық байқауға жолдама алды. Кейін онлайн форматта жіберілген таңдаулы нөмерлер таңдап алынып, кейін Астана қаласында өтетін есептік концертке жолдама беріледі.