Қостанайдағы НЗМ-нің 12-сынып оқушылары Президенттік олимпиаданың республикалық кезеңінде екі алтын, бір күміс медаль жеңіп алды. Биылғы оқу жылында олимпиадаға қатысқан 4 оқушының арасында 1-орынды Ералы Шынтеміров пен Тамерлан Әбділов және 2-орынды Рауан Хамза иеленді.Жалпы, Назарбаев Зияткерлік мектептерінің оқушылары республикалық олимпиадада жетістіктер қоржынын 5 алтын, 5 күміс және 1 қола медальмен толықтырды.
Жаратылыстану-математикалық цикл пәндері бағытындағы XVI Президенттік олимпиада 2023 жылдың 21-24 қарашасы аралығында академик Е.А. Бөкетов атындағы Қарағанды мемлекеттік университетінің базасында өтті.
“Жақсы дайындық және мұғалімдердің көмегінің арқасында жақсы нәтижеге қол жеткіздік. Физика пәні ойлағаннан әлдеқайда қиын болып шықты, бірақ, соған қарамастан, мен кейбір тапсырманы орындап, қажетті ұпайларды жинадым”, – дейді Тамерлан Әбділов.
Айта кетейік, Президенттік олимпиада елімізде 2008 жылдан бері өткізіліп келеді. Республикалық жарыс 11 (12)-сынып оқушыларына арналған.
“Кейбір пән тіпті оңай болып көрінді, біз оларды қиындықсыз жеңдік, бірақ қиынға соққаны физика пәні болды. Апталық тыңғылықты дайындық пен тынымсыз еңбек өз жемісін берді”, – дейді жүлдегерлердің бірі Рауан Хамза.
Биылғы олимпиаданың республикалық кезеңінде математика, физика, химия, биология пәндері бойынша еліміздің 199 үздік оқушысы іріктеліп, білім бәсекесіне түсті.
«Мектептегі сабақ барысындағы мұғалімдермен дайындық олимпиадада бірінші күні-ақ ұпай саны бойынша үлкен басымдыққа ие болып, екінші күні артта қалмауға көмектесті, дегенмен кейбір пәннен жақсырақ дайындалып, үздік нәтиже көрсетуге болатынын енді түсінгендеймін», – дейді 1-орын иегері Ералы Шынтеміров.