Арқалық 2023 жылдың қорытындысы бойынша спорт жұлдыздарын марапаттады.
Осыған орай қаладағы Жас-Ұлан» жасөспірімдер орталығының мәжіліс залында арнайы салтанатты жиын өтіп, спортшыларды қала әкімі Әмірхан Асанов құттықтап, сый-құрмет көрсетті.
Өңірде дене шынықтыру және спортты дамыту саласындағы жұмыстарды 194 дене шынықтыру қызметкерлері жүргізуде. Жыл ішінде қала мен ауылдарда 502 спорттық – бұқаралық іс-шаралар өткізіліп, оларға 25 мың адам қатысқан. Сонымен қатар, спортшылар Нұрсұлтан Қаблан, Александр Шпилевой, Ростислав Исмагилов, Антон Цуркан қала қоржынына дзюдо күресі мен гір спортынан Әлем, Азия чемпионаттарының медальдарын салған.
Қала әкімі Әмірхан Асанов өзінің спортшыларға арнаған құттықтау сөзінде:
«Мемлекет басшысы бұқаралық спортты дамыту жөнінде 2027 жылға дейін халықтың 50%-ін бұқаралық дене шынықтыру және спортпен қамту міндетін қойды. Бүгінде Арқалық қаласында 17 мың адам бұқаралық спортпен белсенді түрде айналысады, бұл қала халқының 44,5%-ін құрайды», – деп атап өтті.
Спорттық инфрақұрылымдарды дамытуда қомақты жұмыстар атқарылуда. Өткен жылы шағын футболалаңы, волейбол, баскетбол алаңдары, сондай – ақ қаланың ықшам аудандары мен кенттерінде көше тренажерлары орнатылды. Спорттық материалдық-техникалық базаны жаңғыртуда 13 млн 109 мың теңгеге спорттық жабдықтар сатып алынды.
Жылдың үздік спортшыларын марапаттау: «Арқалық қаласының үздік спортшысы – 2023», «Мүмкіндігі шектеулі жандар арасында үздік спортшы», «Командалық ойын түрлерінен үздік команда», «Арқалық қалсының үздік жаттықтырушысы – 2023», «Үздік спорт әдіскері», «Үздік спорт нұсқаушысы», Үздік спорттық тапсырысты орындаушы ұйым», Үздік дене шынықтыру мұғалімі», сонымен қатар «Дене шынықтыру мен спорт саласын дамытуға қосқан үлесі үшін» номинацияларымен көрініс тапты.
Марапатталғандардың арасында жас жұлдыздармен қатар, елге еңбегі сіңген Абай Сарыбаев, Рүстем Шалабаев, Александр Шпилевой, Жұлдыз Рахимова, Ораз Дәркенов, Күнтуар Жанкишев, Қанат Қонысбаев, Алтынбек Болатов, Азамат Ерәділов, Сайлау Рыздықов, Данияр Қарпықов сынды бапкерлер бар.
Айтулы шақта бас-аяғы жетпіске жуық адам қала әкімінің «Алғыс хаты» мен ақшалай сыйлығына ие болды. Спортшылар атынан ардагер жаттықтырушы Күнтуар Жанкишев алғысын білдіріп, марапат соңы әдеттегідей қала өнерпаздарының күшімен әзірленген ән-күйге ұласты.
Мұрат Жүнісұлы
Суреттерді түсірген автор
Арқалық қаласы