«Береке» шағын ауданы №38 үйдің жаңа тұрғындарына қала әкімі Марат Жүндібаев пәтер кілттерін табыстады.
«Бүгін қаламызда айтулы күн. Сіздерге пәтер кілттерін тапсырғалы тұрмыз. Жаңа жылды жаңа баспанада қарсы алғалы отырсыздар. Бұл ара күні ертең сіздермен гүлдене түсері сөзсіз. Жуырда екі бірдей мектеп, жаңа балабақша ел игілігіне берілгелі тұр. Жақын арада осы жерді орталықпен байланыстыратын өткел жол салу жоспарлануда», – деді қала әкім пәтер иелерін құттықтауында.
Баспаналы болған Тыныбековтер отбасы бұған дейін қалада, одан қалды жақын маңдағы ауылдық жерден үй жалдап келген.
«Үйдің кезегінде төрт жылдан бері тұрып келдік. Төрт баламыз бар. Көп ұзамай қаланың ортасынан жаңа үйден баспана беріп жатыр. Алғысымыз шексіз», – дейді Айман Тыныбекова.
Отағасы Сақтаған мен Айман Тыныбековтердің қуанышымен бөлісіп, дос-жарандары да келді.
«Бұл отбасы 2020 жылдың желтоқсан айынан кезекке тұрды. Содан бері дос-жаран болып бәріміз күттік. Бүгінгі қуанышымызды сөзбен айтып жеткізу мүмкін емес», – дейді Динара Сарыбаянқызы.
Қостанайлық Гүлмарал Тәуекелова алты баланың анасы.
«Үй кезегіне 2020 жылы тұрған болатынбыз. Ол кезде төрт баламыз бар еді, қазір алтауға жеттік», – дейді Гүлмарал.
Балаларының үшеуі жақын маңдағы №15 мектепте оқып жатыр. Екеуі балабақшада.
Бұл үйдің құрылысын «Рудный соколов сторой» құрылыс кешені бас-аяғы екі жылдың ішінде салып бітірген.
«Бұл үйде 54 пәтер бар. Комерциялық тұрғын үй кешеніне жатады. Жылу-су құбырлары уақытында өткізілді», – дейді мекеме басшысы Санжар Саханұлы.
Биыл жаңа бағдарлама бойынша 5 млрд теңгеге 230 пәтер сатып алынған. Бұл баспаналар кезекте тұрғандарға беріліп жатыр.
Олардың арасында көпбалалы аналар, мүмкіндігі шектеулі жандар тіркеуде тұр. Дәлірек айтқанда, 378 адам осындай бастмамен пәтер иелері атанған. Бұл соңғы үш жылмен салыстырғанда, анағұрлым жақсы көрсеткіш. Қала бойынша 2021 жылдан бері 268 арендалық пәтер тапсырылған еді.
Айбек ЖҮЗБАЙ