“Студенттік көктем – 2024” фестиваліне алты жоғарғы оқу орны қатысты. Олардың қатарында Академик З.Алдамжар атындағы Қостанай әлеуметтік-техникалық университеті, Ахмет Байтұрсынов атындағы Қостанай Өңірлік университеті, М. Дулатов атындағы Қостанай инженерлік-экономикалық университеті және Челябі мемлекеттік университетінің Қостанай қалалық филиалы бар.
Сондай-ақ, фестивальге Арқалық қаласынан Ы. Алтынсарин атындағы Арқалық педагогикалық институты, Рудный қаласынан Рудный индустриалды институты арнайы шақырылды.
“Студенттік көктем – 2024″ фестивальіне 6 жоғарғы оқу орнынан 500-ге жуық адам қатысты. Бұл іс-шараны әр ЖОО-ның студенттері бір-бірімен танысып, араласып, тәжірибе алмасу мақсатымен өткіздік. Студенттерге қолдау көрсету үшін жастар ісі жөніндегі департамент басшылары бірге келді”,– дейді Жастар ресурстық орталығының директоры Абай Дүйсеков.
Фестиваль екі күнге созылды. Бірінші күнгі ашылу салтанатында әр оқу орны өздерін таныстырып өтті.
Сонымен қатар, волейбол, баскетбол және мини-футболдан жарыс өткізілді. Ал, жарыстың қорытындысы келесі күні гала-концертте анықталды. Мерекелік кеште әр университет өздерінің концерттік номерлерін көрсетті.
“Арқалық қаласынан “Студенттік көктем” фестиваліне арнайы келдік. Бізге бәрі ұнап жатыр. Дайындығымыз жақсы болды. Қарсыластарымызға сәттілік тілейміз. Торғай өңірі қазақылықтың ошағы болғандықтан “Молдабайдың әнін” алып келдік”, – дейді Ы.Алтынсарин атындағы Арқалық педагогикалық институтының студенттері.
Түрлі жарық шамдармен, әуезді әнмен әрленген кеште жастар бар өнерлерін ортаға салды. Би билеп, ән айтып, тіпті тарихи, әдеби қойылым да көрсетті.
“Мен Челябі мемлекеттік университетінің Қостанай қалалық филиалының төртінші курс студентімін. Негізгі мамандығым филология саласы. Біз фестивальге “Жаным” сән этнотеатрының “Сахское золото” қойылымын көрсеттік. Көрермендерге ұнады деген ойдамыз”, – дейді Мәриям Дженчураева.
Концерт соңында ректор орынбасарлары жарыс қорытындысы бойынша студенттерге марапаттау қағаздарын, арнайы кубок пен медальдар табыстады.
Барлық жоғарғы оқу орындарына 600 мың теңге көлемінде ақшалай сертификаттар берілді.
Диана БАТЫРБЕК
Суреттерді түсірген Бейбіт Мейрамұлы