Шалғайды аралап, халыққа медициналық көмек көрсетіп жүрген «Саламатты Қазақстан» денсаулық пойызы Арқалық қаласына келді.
Арқалық жұрты ақ халаттыларды ән-күймен құшақ жая қарсы алды.
–«Саламатты Қазақстан» денсаулық пойызы – әлеуметтік қайырымдылық жоба. Сапарымызды осы жылы 26 – шы сәуірінде «Алматы – 2» стансасынан бастаған болатынбыз. Еліміздің 17 облысындағы 121 стансаны жүріп өтеміз деген жоспарымыз бар. Арқалық стансасында екі күн боламыз, – дейді “Саламатты Қазақстан” пойызының бас дәрігері Айнұр Құдайбергенқызы.
Осы уақытқа дейін “Саламатты Қазақстан” пойызының дәрігерлері 25 мыңға жуық адамды қарады. Оның 15 пайызы балалар, қалғаны ересек адамдар.
–Шалғайдағы елді мекендерден келген науқастарға тегін түрде медициналық қызмет көрсетеміз. Науқастарды сақтандыруларының бар-жоғына қарамай жалпылама қабылдай береміз, – дейді бас дәрігер.
Пойыз сегіз вагоннан құралған. Төртеуі медициналық құрал-жабдықтармен жабдықталған. Арнайы пойыздың құрамына биыл халыққа құқықтық көмек көрсету қызметі де қосылған.
–Жоғары кәсіби медициналық мамандардан құралған әлеуметтік жоба – «Саламатты Қазақстан» медициналық пойызын «Samruk-Kazyna Trust» әлеуметтік жобаларды дамыту қоры Әйелдер істері жөніндегі ұлттық комиссиясы мен Қазақстан Республикасы Президентінің жанындағы Отбасылық-демографиялық саясат және Денсаулық сақтау министрлігі «Әлеуметтік жобалар қоры» корпоративтік қорымен бірлесе жүзеге асуда. Әйелдер істері және отбасылық-демографиялық саясат жөніндегі ұлттық комиссияның бастамасымен азаматтарға психологиялық-құқықтық және медиативті көмек беруге кәсіби психологтар, медиаторлар мен заңгерлер алғаш рет тартылды. Азаматтардың мемлекеттік әлеуметтік қолдау алуға құқықтарын қорғау, зейнетақы, жәрдемақы, әлеуметтік төлемдер мен атаулы әлеуметтік көмек тағайындау мәселелері бойынша тегін кеңестер берілуде, – дейді кәсіби юрист-медиатор Гүлнәр Серікқызы.
Қала әкімінің орынбасары Абзал Тәшімов денсаулық пойызының мамандарына жылы лебізін білдірді.
Тұрғындарды қабылдау таңертеңгі тоғыздан кешкі сағат алтыға дейін үзіліссіз жалғасады.
Мұрат Жүнісұлы
Арқалық қаласы