Арқалықтықтар демалыс күні «Демалыс саябағында» ақ халатты абзал жандардың концертін тамашалады.
Көпшілік асыға күтетін жаздың самалды кешінде кезекті рет Арқалық өңірлік ауруханасы қызметкерлері көрермен назарына «Арқалықтың ақ бейнесі – дәрігерлер» атты концерттік бағдарламасын ұсынды.
Еңбек пен өнерді жанына серік етіп жүрген жандар аз емес. Солардың қатарынан адам жанының арашашысы болып саналатын дәрігерлердің де көрінуі жанға жылылық ұялата түскендей.
Мемлекет басшысының «Таза Қазақстан» бағдарламасы аясында өтіп жатқан іс-шаралар кешенінің ойын-сауық бөлімінде денсаулық сақшылары ән-жырды үздіксіз әуелетіп, тыңдарманының құлақ құрышын қандырды.
Дәрігер-мейірбикелер: Айша Сейдеахметова, Венера Жаңабергенова, Сымбат Бекетова, Әйгерім Мырзабаева, Динара Бейсенбек, Айым Якуда және басқа да медицина қызметкерлерінің шырқаған әсем әндері көрермендердің көңілінен шығып, ыстық ықыласына кенелді.
“Жалпы Қазақстан бойынша өтіп жатқан «Таза Қазақстан» экологиялық акциясын құптаймыз. Еліміз көркейіп, гүлдене берсін. Жастарымыз тек қана пайдалы іспен айналысса екен дейміз. Өзім жастайымнан өлең айтамын. Әкем асаба. Барлық жерде ұлттық өнерімізді құндап, қастерлеп жүремін. Қаламыздың әкімі Әмірхан Біркенұлының қолдауымен апта сайын тұрғындардың, әсіресе, жастардың бос уақытының қолайлы өтуін дәріптеген мәдени – демалыс кештері өтуде. Қала және қалаға қарасты ауылдардың, барша мекемелердің арасында өтіп жатқан ізгілікті істен біздің де шет қалмағанымызға зор қуаныштымыз және алғысымызды білдіреміз.Біздің аурухана ұжымы тек сырқаттарды емдеп қана қоймай, мәдениетте де, спортта да үнемі жақсы жетістікке жетіп, өзіміздің жан-жақты екендігімізді нақты ісімізбен дәлелдеп, көрсетіп келеміз», – дейді концерттің ұйымдастырушысы, аурухана акушері Әйгерім Серікқызы.
Баршаға көтеріңкі көңіл күй сыйлаған думанды кеште дәрігерлер көрермендермен сергітпе ойындар ойнатып, сыйлықтарын да сыйға тартты.
Мұрат ЖҮНІСҰЛЫ
Суреттерді түсірген автор
Арқалық қаласы