Қостанайдағы Сырбай Мәуленов гимназиясының ұжымына «Бауыржан оқулары -2024» кубогы табыс етілді.
Аталған оқу орнының шәкірттері Ұлы Отан соғысының даңқты жауынгері, аты аңызға айналған қолбасшы, Халық қаһарманы, қазақ жазушысы Бауыржан Момышұлының 114 жылдық мерейтойына арналған «Бауыржан оқулары» республикалық байқауының үздігі деп танылды.
Байқауға 30 білім беру ұйымдарынан 100-ге жуық 5-11 сынып аралығындағы оқушылар офлайн, ынтымақтастық жұмыс түрінде Қарағанды, Көкшетау, Оңтүстік өңірлерден 15 оқушы онлайн қатысқанын айта кетейік.
Бұл байқау Б.Момышұлы атындағы №5 мектебінің ғимаратында жалпы білім беретін мектеп оқушылары арасында өткізілді.
“Байқау оқушылардың шығармашылық қабілеттерін, эстетикалық сезімдерін, тұлғаның эмоциялық мәдениетін дамытады. Бауыржан Момышұлының рухани мұрасына деген сүйіспеншілікке тәрбиелейді. Гуманизмге, демократияға және азаматтыққа бағдарланған тарихи ойлауды, тұрақты өмірлік ұстанымды, өзіндік сана мен дүниетанымды қалыптастыру мақсатында өткізіліп отыр”, – дейді қалалық білім бөлімінің әдіскері Жанар Жұмағұлова.
Қатысушыларға Қостанай қаласының білім бөлімінің атынан өзге де марапаттар табыс етілді. Онлаин қатысқан өңірлерге марапаттау материалы пошта арқылы жөнелтіледі. Қатысушыларға сертификаттар беріледі.