Қостанайдағы Назарбаев Зияткерлік мектебінің оқушысы Лидия Осенникова «Росатом» мемлекеттік корпорациясының қолдауымен өткен «Білім мұзжарғышы» атты халықаралық арктикалық экспедицияға қатысып келді.
Биыл алтыншы рет ұйымдастырылған бұл бірегей жобаға әлемнің 21 елінен 66 оқушы қатысқан. Қатысушылар Ресейдің Мурманск қаласынан «Жеңістің 50 жылдығы» атты атом мұзжарғышымен сапарға аттанып, Солтүстік полюске жетіп, Франц Иосиф Жеріндегі архипелагқа саяхат жасады.
Он күнге созылған экспедиция барысында оқушылар Арктиканың қатаң табиғи жағдайында ғылыми тәжірибелер жүргізіп, жетекші ғалымдар мен сала мамандарынан атом энергетикасы, экология және ғарыш тақырыптарында дәрістер тыңдады. Сонымен қатар олар климат пен биоалуантүрлілікті зерттеп, мұзжарғыш кеменің жұмыс принциптерімен танысты. Бағдарлама аясында жаһандық экологиялық мәселелер жөніндегі пікірталастар, мұз үстіндегі навигация бойынша практикалық сабақтар және түрлі елдерден келген оқушылар арасында мәдени алмасу ұйымдастырылды.
– Солтүстік полюске барып, Арктиканы өз көзіммен көру — керемет әсер қалдырды. Осындай бірегей экспедицияға қатысу мүмкіндігіне ие болғаныма қуаныштымын. Бұл сапар мені ғылымға тереңірек қызығып, өзімді дамытуға шабыттандырды, – дейді Лидия Осенникова.
«Білім мұзжарғышы» жобасының басты мақсаты — жаратылыстану ғылымдарын насихаттау, талантты оқушыларды қолдау және олардың кәсіби бағдарын анықтау. Жоба жүзеге асқалы бері әлемнің түкпір-түкпірінен 400-ден астам оқушы Арктикаға саяхат жасап, ғылымға алғашқы қадамдарын жасады.