Онда Ы. Алтынсарин атындағы Арқалық педагогикалық институтының қабырғасындағы 29 білім беру бағдарламасы бойынша даярланып жатқан бітіруші жас педагог мамандарға алыс-жақын өңірлерден келген өкілдер жұмысқа орналастыру үшін үгіт-насихат жұмыстарын жүргізді.
Жәрмеңкеге: Қостанай, Ақмола, Ұлытау облыстарындағы білім беру мекемелерінің өкілдері, мектеп директорлары, әдіскерлер қатысты.
Қонақтарды тіркеу рәсімінен соң, институт ректоры Ержан Әмірбекұлы қарсы алып, бітіруші түлектердің кәсіби дайындығы туралы маңызды ақпараттармен бөлісті.
Сонымен қатар әрбір білім беру бағдарламаларының жетекшілері қатысып, кездесу барысындағы сұрақтарға жауап берді.
Институт басшысы өзінің кіріспе сөзінде:
«Торғай даласының ғылымы мен білімі ертеден өз бағасын алған. Институт қабырғасында даярланып жатқан студенттеріміз білім мен қоса ұлттық тәрбиеге бейім. Олар педагогикалық іс-тәжірибе барасында өздерін жоғары деңгейде көрсетіп, шығармашылық тұрғыда даму үстінде. Педагогикалық білімді бақылау тестілеуін де барлығы дерлік сәтті тапсырып шықты. Мамандығына махаббатпен қарайтын түлектерімізбен мақтанамыз», – деп атап өтті.
Мекемелерден 2024-2025 оқу жылына 700-ге жуық жас мамандарға сұраныс келіп түскен. Әсіресе, химия, физика, математика, ағылшын, тілі, орыс тілі, информатика, музыка пән мұғалімдеріне сұраныс деңгейі басым болды.
Педагогикалық білім беру бағдарламаларына деген сұраныстың артуы түлектердің жұмысқа орналасу көрсеткішіне оң әсерін тигізері анық.
2023 жылы «Атамекен» ҰКП жүргізген тәуелсіз сараптамасының нәтижесінде ЖОО арасында «Түлектерді жұмысқа орналастыру» критерийінде Aрқалық педагогикалық институты 94%-пен 1-ші орынды иеленген болатын.
Осы оқу жылында институтты 500-ден аса түлек тәмамдайды.
Олардың арасында «Серпін – 2050» әлеуметтік бағдарламасы, ауыл квотасы, жалпы білім грант иегерлері және келісім-шарт негізінде білім алып жатқан бітіруші түлектері бар. Жәрмеңке қорытындысында студенттерге жұмысқа орналасуға ұсыныстар түсіп, екі жақты белсенді қарым-қатынас өрбіді.
Мұрат Жүнісұлы,
Тоғжан Әбдуәлиева.
Арқалық қаласы