Еске сала кетсек, бұған дейін күрделі жөндеудан өткен мұражай ғимаратына рекспозиция жұмыстары жүргізілген еді. Нәтижесінде, екінші және үшінші қабаттардағы 8 залға жәдігерлер тақырыпқа сай заманауи үлгіде жабдықталып қойылды.
Жалпы, Арқалық қаласындағы облыстық «Дала өлкесі тарихы» мұражайы 1972 жылы 4 ақпанда Қазақ КСР Министрлер кеңесінің жарлығымен құрылды.
Ұлт жанашыры, көрнекті мемлекет және қоғам қайраткері Өзбекәлі Жәнібековтің тікелей басшылығымен Торғай төсінде ашылған жаңа мұражай 1973 жылдың 28 шілдесінде халық батыры А.Имановтың 100 жылдығына орай алғашқы көрермендерін қабылдады.
Музей құрылымының таныстырылымына қатысқан «Тобыл-Торғай» өңірінің абыз ақсақалы, тарихшы, өлкетанушы Мұхтар Қоденов, Жанкелдин аудандық музейлер кешенінің директоры Гүлбану Сәрсекей, қала әкімінің орынбасары Мешітбай Жұманов, қалалық мәслихаттың төрағасы Гүлбану Елтебаева, Арқалық қалалық ардагерлер кеңесінің төрағасы Түбекбай Әубәкіров, «Аналар кеңесінің төрайымы Бақытжамал Қалтаева, Ы.Алтынсарин атындағы Арқалық педагогикалық институтының ректоры Ержан Әмірбекұлы, Арқалық өңірлік мұрағатының басшысы Сағидолла Байгенжин және басқа да құрметті қонақтар жаңа реңкке енген барлық көрме залдарды аралап, құнды жәдігерлермен танысып, жылы лебіздерін білдірді.
«Ел игілігі үшін атқарылып жатқан істерге ризашылығымызды білдіреміз. Біз жөндеу жұмыстары жүргізілген уақыттарда да жұмысымызды тоқтатқан жоқпыз. Музей қорының жәдігерлері ауыспалы көрме ретінде құрылып, әлеуметтік желілерде халыққа насихатталып,мамандарымыз өз жұмыстарын үздіксіз атқарып келді. Жөндеуден өткеннен кейін ғимаратымыз сәулеттене түсті. Музей қорындағы жәдігерлердің сақталуына қолайлы жағдай жасалды. Әлі де атқарылар жұмыстар бар», – дейді мұражай басшысының міндетін атқарушы Рауан Терек.
Биыл музейдің бірінші қабатында орналасқан «Табиғат» залына рекспозиция жұмыстарын жүргізу жоспарланып отыр.
Мұрат ЖҮНІСҰЛЫ
Арқалық қаласы