Биыл жаңа жылдың символдары қаланың төрт жерінде қойылып отыр: облыс әкімдігінің алаңында, «Жастар сарайы» маңында, КСК және Әуежай шағын аудандарында.
Орталықта орналасқан қаланың басты шыршасының биіктігі жиырма екі метр болады. Оның шамдарын салтанатты жағу кешінде ойын-сауық бағдарламасы өткізіледі. Ойын-сауық сағат 18:00-де басталады. Кеште Қостанай қаласының әкімі Марат Жүндібаев тұрғындарды құттықтамақ.
Тұрғындар мен қонақтарға мерекелік көңіл-күй сыйлау үшін қаланы безендіру жұмыстарына биыл ерекше мән берілді. Көппәтерлі сексеннан астам үй көркемдеуші жарықшамдармен әсемделді.
«Дәстүр бойынша, қала орталығында әртүрлі фигуралардан мұз қалашығы тұрғызылып жатыр. Аяз Ата, Ақшақар, жыл атаулары, жұлдызнама белгілері және басқа да ертегі кейіпкерлері болады. Мұздан жасалған қоршау ішінде шанасы бар бұғылардың бейнесі, жарықтандырылған фотоаймақтар, 3 слайдты (үлкен, орта және кіші) және жарықтандырылған лабиринт орнатуды жоспарлап отырмыз», – деп атап өтті қала әкімінің орынбасары Мәжит Шүленов.
Сонымен қатар, үш мұз айдыны салынады. Сити-орталықта, А.Байтұрсынұлы ескерткішінің алдындағы алаңда және қалалық жағажай ауданында конькимен сырғанақ тебуге болады.
Қала әкімдігінде айтылғандай, «Үздік жаңа жылдық безендіру» қалалық конкурсы биыл да өткізіліп жатыр. Оған барлық нысандар мен ұйымдардан бөлек, қала тұрғындары да қатыса алады. Бүгін өтінім қабылдаудың соңғы күні.
«Биыл конкурсқа қатысушылардың санаты кеңейтіледі. Бизнес субъектілерінен басқа, МИБ, ПИТК ұйымдары, облыс орталығының барлық мемлекеттік ұйымдары да қатысады. Комиссия барлығын саралап, жеңімпаздарды мереке қарсаңында жариялаймыз», – дейді М.Шүленов.
Одан бөлек, қалалық білім беру ұйымдары арасында «Үздік қысқы мектеп ауласы» және «Үздік қар мүсіні» байқаулары өтеді. Оған қаланың барлық мектебі қатысады. Байқау аясында жасалған ертегі кейіпкерлерінің мүсіндері қаланың жаңа жылдық безендірілуіне айналады. Жеңімпаздар алғыс хаттармен және бағалы сыйлықтармен марапатталады.
Қостанайлықтарды тағы басқа да қызықтар күтіп тұр. Барлық шағын аудандарды қамту үшін 23-28 желтоқсан аралығында Узкоколейный, Аманкелді, Қонай, Қостанай-2, Дружба, Юбилейный, сондай-ақ «MART» сауда-ойын-сауық орталығында «Мирас» мәдениет үйінің шығармашылық ұжымдары мен өнерпаздарының жаңа жылдық көшпелі концерттері ұйымдастырылады. Сонымен қатар, 28 желтоқсанда кейбір қалалық автобус маршруттарының жолаушыларына Аяз Ата мен Ақшақардың жаңа жылдық ойын-сауық бағдарламалары көрсетілмек.
«Өздеріңіз де хабардарсыздар, «Белсенді ұзақ өмір сүру» жобасы аясында қалада тұрақты негізде аға буын өкілдері арасында танымал болған ретро-би кештері өткізіледі. 23 желтоқсанда «Мирас» мәдениет үйі қостанайлықтарды «Жаңа жылдық көңіл-күй» мерекелік бағдарламасы мен ретро-дискотекаға шақырады», – деп хабарлады қала әкімдігінен.
Қысқы спортты сүйетіндер үшін 23 желтоқсанда «Жаңа жылдық карусель» жеңілатлетикалық жарысы өтеді. Тұрғындар қала орталығындағы басты шыршадан орталық саябаққа дейін жүгіреді. Жеңімпаздарға сыйлықтар үлестірілмек.
«Желтоқсанның соңғы онкүндігінде баршаңызды қалалық жағажай ауданында мұз айдынын ашуға шақырамыз. Осы мерекеде қостанайлықтарды жас мәнерлеп сырғанаушылардың көрсетілімдері, хоккейшілердің көңілді жарыстары, коньки тебу және басқа да қысқы ойын-сауықтар күтеді. Қала тұрғындарына ыңғайлы болу үшін, өткен жылдағыдай, конькиді жалға беру және тамақтану пункттері жұмыс істейтін болады, орталықтан қалалық жағажайға дейін автобус бағыты іске қосылады», – деп мәлімдеді қала әкімінің орынбасары.
Жаңа жыл қарсаңында балдырғандар үшін де жаңа жылдық бағдарлама қарастырылған. 20-30 желтоқсан аралығында жас қостанайлықтар театрларда мерекелік қойылымдарды тамашалай алады. Спектакльдерді өткізу кестесімен театрлардың ресми интернет-ресурстарында және әлеуметтік желілерде танысуға болады.
Қалалық балалар шығармашылығы мектебінде «Көшбасшылар шыршасы» өтеді. Дәстүр бойынша іс-шараға қаланың 36 мектебінен халықаралық және республикалық конкурстар мен спорттық жарыстардың жеңімпаздары (100 оқушы) қатысады деп жоспарланған. Іс-шараның әрбір қатысушысына қала әкімінің атынан жаңа жылдық сыйлық табыс етіледі.
Дәстүр бойынша жаңа жылдық мерекелерде қайырымдылық іс-шаралар мен акциялар да ұмыт қалмақ емес. Тірек-қимыл аппараты бұзылған балалар мен психоневрологиялық аурулары бар 18 жастан асқан адамдар үшін мерекелік іс-шаралар өтеді. Үйде оқитын ерекше қажеттіліктері бар балалар үшін «Тілектерді орындау автобусы» жаңа жылдық бағдарламасын ұйымдастырады. Балалар мерекелік безендірілген автобуста жаңа жылдық қалаға экскурсия жасайды, басты шыршаның жанында Аяз Ата мен Ақшақармен кездеседі, қуыршақ театрында жаңа жылдық қойылымға барады.
Сондай-ақ, білім бөлімі аз қамтылған отбасылардан шыққан балаларға арналған мерекелік шырша ұйымдастырады. Іс-шараға 1-11 сыныптан 400-ден астамы оқушы қатыстырылмақ. Сонымен қатар, білім беру ұйымдарында жаңа жылдық ертеңгіліктер өтеді, онда 2 мыңнан астам бала жаңа жылдық тәтті сыйлықтарға кенелмек.
Аслан ҚАНҒОЖИН