Биыл Денисов ауданының ауылдық округтері мен ауылдарында шағын футбол және баскетбол ойнауға арналған 7 спорт алаңы орнатылып, Фрунзе ауылында жасанды жабыны бар хоккей корты пайдалануға берілді.
Денисов ауданында спортпен айналысамын деген әрбір азаматқа қолайлы жағдай жасалған. Өңірде жаңа заманауи спорт кешендері бой көтеріп, халық игілігіне берілуде. Соның бірі – көп салалы спорт кешенінің құрылысы. Ғимараттың жалпы ауданы – 1732,7 ш. м. Жобаны «Samruk-Kazyna Trust» корпоративтік қоры қаржыландырды. Жұмсалған қаражат – 239 млн теңге. Мердігер – «ПСК Дизайн строй» ЖШС.
Алаңда жүгіру жолағы, сондай-ақ, шағын футбол, волейбол, баскетбол алаңдары және теннис корты бір жерге біріктірілетін болады. Аталған спорт түрлерімен айналысу үшін кешен барлық қажетті құрал-жабдықтармен қамтамасыз етіледі.
«Жаңа спорт кешенінің құрылысы спорт секциясына келуші балалардың кең залда жаттығуына мүмкіндік береді. Атап айтқанда, еркін күрестен балалар мен жасөспірімдер спорт мектебінің тәрбиеленушілері жаттыға алады. Ауыр атлеттерге арналған тұғырлар саны көбейтіліп, спорттық іс-шаралар мен секциялардың сапасы мен саны артады», – дейді аудандық дене шынықтыру және спорт бөлімінің басшысы Наталья Филатова.
Бұл ғимарат аудандағы үлкен спорт кешендерінің бірі болмақ. Онда бір мезгілде 50-ге жуық адам жаттыға алады. Құрылыс материалдары Украина және Астана, Алматы, Қарағанды қалаларынан әкелінген. Ғимарат іші көгілдір отынмен жылытылады. Ғимарат алдына толықтай төсемтас төселеді.
«Құрылыс жұмыстары мамыр айында басталған. Жоспар бойынша қараша айында аяқтауымыз керек. Бірақ ауа райына байланысты жұмыс тоқтап қалған күндер болды. Күн ашық болса белгіленген уақытта тапсырамыз. Құрылыс жұмыстары басталған уақытта 12 адам жұмыс істеді. Олардың арасында жұмыспен қамту орталығы арқылы 5-6 адам болды. Қазір әрлеу, абаттандыру жұмыстары ғана қалды», – дейді «ПСК Дизайн строй» ЖШС өкілі Ермек Әбдібәки.
«Өңірімізде бұқаралық спорттың дамуына көп көңіл бөлінуде. Жыл сайын спорттық нысандар саны артып келе жатқаны қуантады. Спортшылардың шынығуына қажетті жабдықтардың барлығы бар. Спортпен шұғылданатын жастарымыздың жаттығуына қолайлы жағдай жасап жатқан аудан басшысына ризашылығымызды білдіреміз. Спорт саласында ауданымыздың атын шығаратын жастарымыз көбейе берсін», – дейді жергілікті тұрғын Мұрат Динкенов.
Осы күнге дейін аудан спортшыларының жеткен жетістіктері аз емес. Мәселен, жастар арасында баскетболдан Ясмин Досова және Егор Шенкель ҚР чемпиондары, волейболдан Диана Джесова, Аяжан Дүйсенбаева, Лиана Малюга ҚР чемпионаттарының чемпиондары мен жүлдегерлері.
Сондай-ақ, ауыр атлетикадан Ангелина Васечкина ҚР чемпионы, Анжела Мырзахметова ҚР чемпионатының жүлдегері, бокстан Жанна Нұртлесова ҚР жүлдегері, ал дойбыдан Алексей Белый ҚР жүлдегері атанған. Волейбол және футбол командалары облыстық спартакиаданың қола жүлдегерлері атанған.
Әсел ҚИБАШ
Суреттерді түсірген Б. МЕЙРАМҰЛЫ
Денисов ауданы