Мұғалімдер күнінде қала әкімі Әмірхан Асанов пен білім қызметкерлерінің кәсіподақ ұйымы филиалының төрағасы Алмас Бекин ұстаздар қауымын құттықтап, бірқатар марапаттарды табыс етті.
Қазақстан Республикасы Оқу-ағарту министрінің Құрмет грамотасымен А.Құнанбаев атындағы №6 мектеп-гимназияның мұғалімі Қымбат Бәйкенова марапатталды.
–Қалаған мамандығым бойынша қырық жылға жуық жұмыс істеп келемін. Шәкірттеріміз ҰБТ тапсырудан жыл сайын жақсы нәтиже көрсетіп жүр. Мектебіміз жаңа оқу жылында жаңа талапқа сай жабдықталуда. Жалпы, өзінің мамандығын сүйген, жаңалыққа жаны құмар адам қай жерде болмасын, жақсы қызмет істейді және сол білімді оқушыларға бере алады, – дейді ұлағатты ұстаз.
Қосымша білім беру орталығының басшысы Зәуреш Латыпова Президентіміздің ұстаздар еңбегін бағалап, мұғалімдер күнін арнайы мерекелік күнтізбеге енгізгеніне дән риза. Жылдан-жылға ұстаздарымызға өте жақсы көмек беріліп жатыр. Мұғалімдердің, тәрбиешілердің еңбекақылары өсуде. Мұның бәрі еліміздегі ұстазға деген үлкен құрмет.
– Бүгін төл мерекемізді жоғары деңгейде атап өтуіміздің себебі де осы. Ұстазға деген құрмет қашан да ерекше болып қала береді, – дейді қала әкімінің Құрмет грамотасымен марапатталған Зәуреш Мақсұтқызы.
Иә, қандай да бір мамандық иелері болсын, бірінші ұстаздың алдынан өтетіні сөзсіз.
Сондай-ақ, облыс әкімінің, Білім және ғылым ұйымдары қызметкерлерінің, жергілікті кәсіптік одақ қоғамдық бірлестіктерінің Құрмет грамоталары да өз иелерін тапты.
Облыс әкімінің Құрмет грамотасымен қалалық білім бөлімінің сектор меңгерушісі Әскербек Хасенов, облыстық білім басқармасының Құрмет грамотасымен Кейкі батыр атындағы №4 жалпы білім беретін мектебінің директоры Күлназия Мұқашева және көптеген ұстаздар марапатталды. Қостанай облысы білім қызметкерлерінің кәсіподақ жұмысының қозғалысына сіңірген еңбегі үшін төсбелгісі Ы.Алтынсарин атындағы гимназияның директоры Ақтоты Қисықова мен Үштөбе ауылындағы Сарыөзен жалпы білім беретін мектебінің мұғалімі Наталья Щетинкоға табыс етілді.
Ұстаздар құрметіне Н. Құлжанова атындағы Торғай гуманитарлық колледжінің ұжымы мерекелік концерт ұйымдастырды.
Мұрат ЖҮНІСҰЛЫ
Арқалық қаласы