Қостанай қалалық «Мирас» мәдинет үйінде облыстық «Super» лига Жайдарман 1/2 финал ойындары өтті. Оған жалпы саны 8 команда қатысты.
Осымен 14-ші маусымын ұйымдастырып отырған КВН ойындары Қоғамдық даму басқармасының жанындағы Жастар ресурстық орталығының тапсырысы бойынша жүзеге асқанын айта кетейік.
«Жекпе-жек» форматында өткен ойында әр команда жеңіс тұғырынан көріну үшін барын салды. Аталмыш лига ұйымдастырушы, «Жайдарлы жастар» қоғамдық қорының директоры Марғұлан Бәкірдің айтуынша, жастардың басын бір арнаға тоғыстыратын лиганың пайдасы зор.
– Бүгінгі ойында 8 команда өз өнерлерін көрсетті. Атап айтқанда, төрт команда Арқалық қаласынан, екеуі Торғайдан, біреуі Рудный қаласынан және Қостанайдан бір команда қатысуға келді. Командалар ішінен жеңген төрт команда финалға жолдама алды. Финал 8-ші қарашаға жоспарланып отыр. Ал финалдағы жүлде қоры 1-ші орынға 500.000, 2-ші орынға 300.000, 3-ші орынға 200.000 және «Үздік ойыншыға» 50.000 теңге ақшалай сыйлық беріледі, – дейді М. Бәкір.
Жиналушы көрерменнің езуіне күлкі сыйлайтын Жайдарман ойындарының басты мақсаты – қазақ тілін дамыту және мемлекеттік тілді насихаттау болып саналады. Осыны негізге алған ойыншылар әзілдерінің басым бөлігін қоғамдағы оқиғалар мен мәселелерге баса назар қойған. Қостанайда орын алып жатқан соңғы жаңалықтарға мән беріп, тартымды әзіл арқылы жеткізе білді.
–Жайдарман ойындарын ойнап жатқанымызға биыл жетінші жыл. Осы ойынға бір аптаға жуық уақыт дайындалдық. Команда құрамында 5 бала бармыз, бірақ өкінішке қарай бір бала жеке себептерге байланысты келе алмай қалды. Ойында төрт бала болып ойнадық. Басты қарсыласымыз «Бренд» командасы. Себебі, олар Қостанай жайдарманының жілігін шаққан ойыншылар деуге болады, – деді «Техас» құрмасының капитаны Мақсат Жарылқасын.
Ойын нәтижесі бойынша Арқалықтан келген «Айқаз» және «Жер жарар», Рудныйлық «Техас», Торғайлық «Болашақ Астана» сынды командалар финалдық ойынға жолдама алды. Облыстық 1/2 финалдық сайыстың «Үздік» ойыншысы әрі 30.000 теңгелік сертификат Мейрамбек Бейсенбекке табысталды.
Бейбіт Нұрмұханов
Суреттерді түсірген автор