Қасиетті құрбан айт мерекесін арқалықтықтар да жылдағыдай ұйымдасқан түрде жоғары сән-салтанатымен атап өтті.
Ұлыстың ұлы күнінің құрметіне «Мұхтасиб Әлмұхамед» атындағы Арқалық қалалық мешітінің алаңқайына арнайы ақшаңқан киіз үй тігіліп, алланың жердегі үйіне қадам басқан барша қауымға ақ дастарханнан дәм ұсынылды. Жиналған жамағат қалалық мешіт және «Жігер», «Қайрат» спорт кешендері ұжымдары бірлесіп ұйымдастырған спорттық шараларды тамашалады.
«Қастерлі құрбан айт мерекесі қаламызда биыл да сәтті басталып жатыр. Таңертең айт намазы оқылды. Қаламыздың әкімі Әмірхан Біркенұлының бас болуымен «Торғай ЕТ» ЖШС ет комбинатында құрбандықтар шалынды. Қала әкімдігі, қалалық мешіт, Абай Құспанұлы ағамыз басқаратын «Алюминстрой» ЖШС сондай – ақ, өзге де қала азаматтарының ниет етуімен 5 ірі қара және өзге де ұсақ малдардан құрбандық жасалды. Құрбандыққа сойылған малдардың еттерін «Халықты әлеуметтік қорғау» қызметінің ұсынымымен аз қамтылған 150 – дей отбасыға тізіммен таратып беріп жатырмыз», – дейді қалалық мешіттің бас имамы Нұрхан қажы Бақтыбай.
Спорттық шаралардың жанкүйерлері мол. Мерекелік шараларда спорт сүйер қауым тек қана жанкүйер болып қоймай, өздері де қатысуға ынта білдіріп «Қол күресі», «Өгіз тартыс», «Арқан тартыс», дартс, гір көтеру сынды спорт түрлерінен бақтарын сынады. Жарыс жеңімпаздары мен жүлдегерлеріне малдай және ақшалай сыйлықтар, грамоталар мен медалдар салтанатты түрде табыс етілді.
Көшер Сарин,
қала тұрғыны:
– Алланың құрметті күні қабыл болсын. Мешітке немереммен бірге келдім. Болып жатқан шараларды зор қызығушылықпен бірге көріп, тамашаладық. Жылда елімізге осындай жақсы күндерді нәсіп етсін.
Марғұлан Сабыржанов,
қала тұрғыны:
– Барша қауымды келіп жеткен ұлық мерекеміз «Құрбан айт» мейрамымен шын жүректен құттықтаймын. Бүгінгі айт күні қаламызда ұйымдастырылған шаралардың бәрі жақсы, өте жоғары деңгейде өтті. Спорттық шараларға өзіміз де қатысып, біраз серпіліп қалдық. Әрдайым ел – жұртымыз аман болсын.