Қостанайда Бейімбет Майлиннің 130 жылдық мерейтойы қарсаңында «Бейімбет оқулары» байқауы өткелі жатыр. Бастаманы «Qazaqstan Construction Holding» ЖШС «QC Read» жобасы аясында қолға алған.
Осылайша көрнекті прозаик, қазақ жазба әдебиетінің негізін қалаушы Ұлы Жазушының шығармашылығын жасөспірімдер арасында танытып, кітап оқу мәдениетін қалыптастыруды көздеген байқау қазан айында өтеді.
Байқауға Рудный қаласы және Бейімбет Майлин ауданындағы мемлекеттік жалпы білім беру ұйымдарының 8-11 сынып оқушылары қатыса алады. Оқушылар қазан айының 28-не дейін тіркелсе болады. Байқау Бейімбет Майлиннің 9 әңгімесі бойынша өтеді. Қатысушыларға дайындық кезеңінде берілген «Шұға», «Күлпаш», «Айт күндері», «Талақ», «Түйебай», «Әже», «Тайдың баласы», «Даудың басы – Дайрабайдың көк сиыры», «Қара шелек» шығармаларын оқып шығу қажет.
«Бейімбет оқулары» байқауы екі кезең бойынша өтеді. 1-кезең 31 қазан сағат 10:00-де басталады. Берілген шығармалар бойынша тест сұрақтарына жауап беріп, екінші кезеңге өткен үміткерлердің аты-жөндерін жарияланады. Оқушыларға 60 сұрақтан тұратын тест беріледі. Жауаптарды белгілеу уақыты 1 сағат. Ал 2-кезеңде жеребемен анықталған бір шығарма бойынша эссе жазады. Ал байқау қорытындысы және марапаттау салтанаты 1 қараша күні өтеді.
Қазылар алқасының құрамында Абылай Мауданов, Қазақстан Жазушылар одағының мүшесі, – төраға, Нұрқанат Құлабаев – ақын, ұстаз, «Егемен Қазақстан» газетінің меншікті тілшісі және Биалаш Cүйінкина – Білім беру ісінің үздігі, ардагер ұстаз бар.
Байқаудың І, ІІ, ІІІ орын жеңімпаздары ұйымдастырушылар тарапынан бағалы сыйлықтармен марапатталады. І орын – Iphone 15 PRO, II орын – Apple iPad 2022, III орын – Apple iPad 2021.
Байқаудың шарттары мен талаптары, сондай-ақ байқауға қатысушыларға ұсынылған шығармалар тізімі «QC Holding» ЖШС@qc_holding және Рудный қаласының білім бөлімі@rudniy_b_b әлеуметтік желідегі ресми парақшаларына жарияланады.