Облыстық Мемлекеттік қызмет істері департаментінің басшысы, Әдеп жөніндегі кеңестің төрағасы Ерлан Салықбаев жаңашылдықтар хақында ауқымды ақпараттарын бөлісіп, сапалы мемлекеттік қызмет көрсету, әдеп тұрғысында сөз қозғады.
Бұл бағытта Арқалық қаласы облыста үздік үштіктің қатарына кіреді. Қала бойынша 125 адам мемлекеттік қызметте. Қосымша 6 ваканция бар. Мемлекеттік қызметтегі әйелдердің үлесі 50 пайызды құрайды.
Нәзік жандылардың 20-сы басшылық қызметте. Жастардың үлесі – 54 адам. Мемлекеттік қызметшілердің 115-і жоғары білімді. Биыл 52 мемлекеттік қызметші білімін жетілдірген.
Бүгінгі таңда халықпен кері байланыс орнату қарқынды дамып келеді. Мемлекет басшысының тапсырмасымен «Еститін мемлекет» тұжырымдамасы аясында кез келген адам өзінің сұрағы бойынша әрбір мемлекеттік қызметке қоңырау шалып, қабылдауларына кіре алады.
Елімізде жақсы қолдау болғандықтан, жастар мемлекеттік қызметке тұруға ынталы. Мемлекеттік қызметке білімді жастарды тарту күн тәртібінен түспейді. Жаңа ережелерге сай, енді грантқа оқыған түлектер мемлекеттік қызметтің алғашқы сатысына конкурссыз өте алады. Осы жылы облыс бойынша 12 түлек мемлекеттік қызметке конкурссыз орналасса, соның үшеуі Арқалық қаласынан. Жастарды мемлекеттік қызметке тарту мәселелері жөнінде Мемлекеттік қызмет істері жөніндегі департаментінің басқарма басшысы Азамат Байтұрсынов қаланың студент жастарымен өткен кездесуде кеңінен мәлімдеп берді. Сондай-ақ, мемлекетті қызмет істері жөніндегі облыстық басқармалардың басшылары жеке қабылдауларын өткізіп, мемлекеттік қызметшілердің ҚР Мемлекеттік қызмет туралы заңы аясында туындаған сұрақтарына жауап берді. ХҚКО, АХАТ, Тіркеу және жер кадастры бөлімі, Әлеуметтік қамтамасыз ету бөлімі, жұмыспен қамту және әлеуметтік бағдарламалар бөлімі, Арқалық қалалық тестілеу орталықтарында болып, халыққа көрсетіліп жатқан мемлекеттік қызметтердің сапасымен танысты.
Мұрат ЖҮНІСҰЛЫ
Суреттерді түсірген автор
Арқалық қаласы