Қазақстан Республикасының рәміздер күні қарсаңында аудан әкімі Талғат Карбозов Қ.Әбенов атындағы аудандық мәдениет үйінің директоры Олжас Қылдыбаевқа “JAC SUNRAY” автокөлігінің кілтін табыс етті.
Осы уақытқа дейін аудандық мәдениет үйінде қызметкерлерге арналған автокөлік болмаған. Өнер адамдары қолда барды амалдап іссапарларға жеңіл көлікпен шығатын.
— 2006 жылы фестивальден газель көлігін ұтқанбыз. Ол он жылдай қызметімізге жарап, 2016 жылы қолданыстан шығарылды. Содан бері бізде өнер адамдарын тасуға арналған көлік жоқ еді. Енді, мемлекеттік рәміздер күнінде осындай көлік беріліп жатқаны біз үшін үлкен қуаныш, – дейді дейді аудандық мәдениет үйінің директоры Олжас Қылдыбаев.
“JAC SUNRAY” қостанайлық “СарыарқаАвтоПром” ЖШС-нен шыққан. Көлікті алу үшін облыстық мәдениет басқармасынан 16 млн 155 мың теңге, аудандық бюджеттен 4 млн 565 мың теңге бөлінді.
Аманкелді ауданы.